18 vjet nga marrëveshja që ndryshoi historinë: Formimi i koalicionit PDK-LDK

9 janari i vitit 2008 shënon një kthesë vendimtare në historinë politike të Kosovës moderne. Në këtë ditë, dy rivalët më të mëdhenj politikë të pasluftës, Partia Demokratike e Kosovës (PDK) dhe Lidhja Demokratike e Kosovës (LDK), zyrtarizuan koalicionin qeveritar që do ta udhëhiqte vendin drejt shpalljes së Pavarësisë.

Me Hashim Thaçin si kryeministër, kjo qeveri u formua pas zgjedhjeve të 17 nëntorit 2007, ku PDK kishte fituar 34% të votave, ndërsa LDK kishte radhitur 23%. Rezultati i këtyre zgjedhjeve detyroi dy taborët që dikur shiheshin si të papajtueshëm, të uleshin në një tryezë për një qëllim madhor: përmbylljen e statusit të Kosovës.

Një kabinet i fokusuar te shtetndërtimi

Qeveria e asaj kohe përbëhej nga kryeministri, dy zëvendëskryeministra dhe 17 ministri. Prioriteti absolut ishte koordinimi me faktorin ndërkombëtar për deklaratën e pavarësisë dhe hartimin e Kushtetutës së parë të shtetit të ri. Paritë politike, pavarësisht dallimeve, kishin premtuar unitet deri në hyrjen në fuqi të Kushtetutës.

Përtej politikës së madhe, kjo qeveri nisi edhe proceset e para të shtetësisë praktike. Në korrik të vitit 2008, filluan të lëshoheshin pasaportat e para të Republikës së Kosovës, ndërsa në shtator u emëruan 10 përfaqësuesit e parë diplomatikë në vendet që tashmë e kishin njohur pavarësinë, duke hapur kështu rrugën për subjektivitetin ndërkombëtar të vendit.

Sfidat dhe hijeve të para të qeverisjes

Megjithë entuziazmin për pavarësinë, rrugëtimi nuk ishte pa sfida. Raporti i Progresit i asaj kohe evidentonte vështirësitë në veri të vendit, ku autoriteti i qeverisë ishte i kufizuar në fusha si policia dhe doganat. Në disa zona me shumicë serbe, filloi implementimi i legjislacionit serb për qeverisje lokale, një problem që vazhdon të jetë sfidues edhe sot.

Po ashtu, filluan të shfaqeshin kritikat e para për ndërhyrje politike në bordet e ndërmarrjeve publike dhe emërime të rëndësishme, duke ndikuar në kredibilitetin e institucioneve të reja. Sidoqoftë, fokusi kryesor mbetej te pavarësia.

“Më 17 shkurt 2008, ligjvënësit e Kosovës do të kryenin aktin historik; nënshkruan dhe miratuan solemnisht Deklaratën e Pavarësisë.”

Sot, 18 vite më pas, ky koalicion mbetet në kujtesën politike si momenti kur uniteti i përkohshëm mes forcave kryesore mundësoi lindjen e shtetit. Ishte koha kur rivaliteti partiak u la anash përballë interesit nacional, një leksion që vazhdon të diskutohet në skenën politike të sotme.