28-vjetori i sulmit ndaj familjes Jashari në Prekaz: UÇK-ja nis armatimin nga Bajram Curri me 96 armë

Sot, më 22 janar, shënohet 28-vjetori i sulmit të parë të forcave serbe ndaj familjes Jashari në Prekaz i Madh, ngjarje kjo që shënoi fillimin e fazës së hapur të rezistencës së armatosur të popullit të Kosovës kundër okupatorit serb.

Në të njëjtën ditë, trimat e Ushtrisë Çlirimtare të Kosovës (UÇK) ndodheshin në Bajram Curri për të sjellë armatim në Kosovë, duke kontribuar në përgatitjet për luftën çlirimtare.

“22 janari – ditë kujtimesh dhe krenarie. Më 22.01.1998, kur familja Jashari u sulmua në Prekaz, ne ishim në Bajram Curr, në shtëpinë e Besnik Krasniqit – strehë e UÇK-së – me heronjtë Mujë Krasniqin, Ilir Konushevcin, Qerim Kelmendin, si edhe bashkëluftëtarë të tjerë, ndër ta Rexhep Selimi i cili tash e 5 vje padrejtësisht po mbahet ne Haag,dhe Nasim Haradinaj, Xhabir Zharku… Lajmi për sulmin na vuri në lëvizje pa hezitim. Ndërsa Jasharajt zmbrapsnin armikun, ne futëm në Kosovë 96 armë për luftën që po vinte. Sot ata nuk janë më, por lavdia e tyre jeton përjetë. Lavdi dëshmorëve”

Lahi Brahimaj, ish-luftëtar i UÇK-së, ka ndarë këto kujtime krenarie përmes një postimi në Facebook, shoqëruar me foto epike nga ajo ditë historike.

Sulmi ndaj familjes Jashari në Prekaz ishte një nga momentet vendimtare që ngriti në këmbë popullsinë shqiptare dhe forcoi angazhimin e UÇK-së për çlirimin e Kosovës. Trimat e përmendur, si Mujë Krasniqi, Ilir Konushevci, Qerim Kelmendi, Rexhep Selimi (i cili ende mbahet padrejtësisht në Hagë), Nasim Haradinaj dhe Xhabir Zharku, ishin pjesë e këtij veprimi të rëndësishëm.

Shtëpia e Besnik Krasniqit në Bajram Curri shërbeu si strehë e sigurt për luftëtarët e UÇK-së, nga ku u nis transporti i armatimit drejt Kosovës.

Kjo ngjarje vazhdon të jetë simbol i trimërisë dhe sakrificës së bijve dhe vajzave të Kosovës për liri dhe pavarësi. Lavdi e përjetshme dëshmorëve të kombit!