83-vjeçari Zymeri nga Jezerci, babai i dëshmorit të UÇK-së Sali Baliu, kërkon vetëm një strehë dinjitoze

Në Ferizaj, 83-vjeçari Zymeri nga fshati Jezerci po përballet me vështirësi të mëdha për të siguruar një strehë të përshtatshme. Ai jeton me qira bashkë me bashkëshorten dhe tre fëmijët e tij, në kushte të rënda.

Familja e tij ka dhënë kontribut të madh për lirinë e Kosovës. Zymeri është babai i dëshmorit Sali Baliu dhe i pesë ushtarëve të tjerë të Ushtrisë Çlirimtare të Kosovës (UÇK). Përveç kësaj, vetë ai ka qenë i burgosur politik, duke vuajtur 12 muaj burg në Pozharevc të Serbisë.

Pavarësisht sakrificave, sot Zymeri nuk synon luks, por vetëm një banesë ku të mund të jetojë me dinjitet. Humanisti Agon Zhinipotoku ka marrë përsipër pagesën e qirasë dhe planifikon t’i dhurojë një karrocë elektrike për të lehtësuar lëvizjen në qytet.

“Dëshira më e madhe e tij është të takohet një ditë me humanistin Halil Kastrati.”

Kjo histori prekëse nxjerr në pah nevojën urgjente për ndihmë sociale ndaj veteranëve dhe familjeve të dëshmorëve. Digjital.com i bën thirrje institucioneve kompetente dhe bamirësve të kontribuojnë për të siguruar një strehë të qëndrueshme për Zymerin dhe familjen e tij.

Mos e lëmë vetëm babanë e dëshmorëve. Ndihma juaj mund të ndryshojë jetën e tij.