Përditësim: Abdixhiku publikon reagimin e plotë në Facebook - 'Më shumë se dorëheqja nuk kam çfarë të ofroj'

Kreu i Lidhjes Demokratike të Kosovës (LDK), Lumir Abdixhiku, ka publikuar një postim të gjatë në Facebook ku ripërsërit ofertën për dorëheqje nga posti i kryetarit, pas një mbledhjeje të gjatë 5.5-orëshe me anëtarët e partisë.

Postimi vjen pas dorëheqjes së Hykmete Bajramit nga pozita e nënkryetares dhe në mes të krizës brendshme në LDK pas rezultateve të dobëta në zgjedhjet e fundit.

“Më shumë se dorëheqja nuk kam çfarë të ofroj! Kam dëgjuar dhe jemi dëgjuar me njëri-tjetrin me vëmendje. Çdo zë, çdo kritikë dhe çdo shqetësim, me orë të tëra. Pesë orë e gjysmë. Në fund kemi dalur me përgjegjësi të plotë dhe me dinjitet para qytetarëve për të shprehur jo mendimin e një individi, as timin, por të shumicës dërmuese, ashtu siç u pajtuam pas pesë orë diskutimi. Nuk i shmangemi asnjë përgjegjësisë dhe nuk i ikim asnjë reflektimi. Unë, edhe më pak. Kam marrë hapin më moral që një kryetar mund ta marrë: kam ofruar dorëheqjen time. Kam hapur rrugën për secilin që ka pretendime. Jeni të lirë të garoni; në Kuvend e keni mundësinë. Tani vendimi nuk është më i imi, është i LDK-së. Dua ta them qartë; nuk jam i lidhur pas pozitës. Jam i lidhur pas shtëpisë. Dhe shtëpia ruhet me rregull, me dinjitet dhe me besim në anëtarësinë e saj dhe në secilën kërkesë të tyre. Më shumë se dorëheqja nuk ka çfarë të ofrojë një politikan. Eliminimet politike mund të jenë legjitime si aspiratë, por edhe për to vendos anëtarësia si tërësi, jo ne individualisht. Kemi thirrur Kuvendin. Aty flasim hapur. Aty propozojmë hapur. Aty vendosim hapur. Le ta presim Kuvendin. Le ta mbajmë debatin para shtëpisë sonë, me orë të tëra, me ditë të tëra po qe nevoja. Jemi të njohur për demokraci dhe liri veprimi. Le të sillemi me përgjegjësi. Sepse LDK nuk është reagim i çastit, nuk është as protagonizëm i ditëve të vështira; edhe më pak vendim i rrjeteve sociale e duartroktijeve të kundërshtarëve. LDK është institucion. Ta keni të qartë. Jo sot, jo dje po gjithëherë: Fatin tim politik e vendos përballë LDK-së, jo mbi LDK-në. Dhe çfarëdo vendimi që merr Kuvendi, do ta respektoj me nder dhe qetësi Deri atëherë, le të sillemi si mbrëmë e si deri tash, pa dramë e pa protagonizëm, ballëhapur e me dinjitet. Sepse mbi çdo emër është LDK. Dhe kështu na takon të gjithëve.”

Abdixhiku thekson se nuk shmanget nga përgjegjësia dhe lë vendimin te anëtarësia e LDK-së në Kuvend. Ai fton për debat të hapur dhe demokratik, duke nënvizuar se LDK është institucion dhe jo reagim i çastit.

Kjo zhvillim vjen në kontekstin e krizës brendshme në LDK pas humbjes në zgjedhjet e fundit, ku partia mori rezultate më të dobëta se herët e mëparshme.

Burimi: IndeksOnline