AIP bën thirrje institucioneve arsimore: Kujdes në mbrojtjen e të dhënave personale në shkolla

Në rastin e shënimit të Ditës Ndërkombëtare për Mbrojtjen e të Dhënave Personale, Agjencia për Informim dhe Privatësi (AIP) ka nxjerrë një reagim ku thekson domosdoshmërinë e respektimit të legjislacionit në fuqi për mbrojtjen e të dhënave personale në sistemin arsimor të Kosovës.

AIP u ka bërë thirrje të gjitha institucioneve edukative dhe arsimore që të marrin masa të nevojshme për të ruajtur të dhënat personale të nxënësve, prindërve dhe punonjësve të tyre, duke iu përmbajtur parimeve të ligjshmërisë, transparencës, sigurisë dhe minimizimit të të dhënave.

Obligim ligjor dhe etik

Në epokën digjitale, ku teknologjia informative është e pranishme në çdo aspekt të jetës, AIP nënvizon se mbrojtja e privatësisë së fëmijëve nuk është vetëm një detyrim ligjor, por edhe një përgjegjësi etike dhe morale ndaj shoqërisë.

“Agjencia kërkon nga institucionet arsimore të ndërmarrin veprime të parandalimit të rreziqeve që lidhen me keqpërdorimin, shpërndarjen e paautorizuar apo cenimin e të dhënave personale dhe të ndërmarrin masa të përshtatshme teknike dhe organizative për të garantuar sigurinë e të dhënave personale.”

Institucionet arsimore inkurajohen të zbatojnë masa të avancuara për të parandaluar çdo lloj keqpërdorimi të të dhënave, duke siguruar që informacionet personale të trajtohen me përgjegjësi të lartë.

Bashkëpunim i gjithanshëm

AIP fton mësimdhënësit, prindërit dhe nxënësit të bashkohen në përpjekje për të ndërtuar një kulturë të respektimit të privatësisë përmes edukimit të vazhdueshëm dhe ndërgjegjësimit.

Mbrojtja e të dhënave të fëmijëve konsiderohet si parakusht për sigurinë, dinjitetin dhe privatësinë e tyre, e garantuar me Kushtetutën e Kosovës dhe konventat ndërkombëtare.