Përditësohet: Aksion policor në Zubin Potok, pesë të dyshuar për bixhoz të paligjshëm dhe skema piramidale

Zëvendësdrejtori i Policisë së Kosovës për rajonin e Mitrovicës së Veriut, Veton Elshani, ka dhënë detaje të reja lidhur me aksionin policor të zhvilluar më 15 janar 2026 në Zubin Potok, ku u bastisën tri lokale të dyshuara për veprimtari të kundërligjshme si bixhoz i paligjshëm dhe skema piramidale.

Njësinë e hetimeve të Stacionit Policor Zubin Potok në Direktorinë Rajonale Policore Mitrovicë Veri i ka ardhur një informatë nga rrugët operative se në tri lokale në qytetin e Zubin Potokut po zhvilloheshin aktivitete të tilla ilegale.

““Me datën 15.01.2026, njësia e hetimeve të stacionit policor Zubin Potok në DRP Mitrovicë Veri ka pranuar një informatë se në tri lokale në qytetin e Zubin Potokut janë duke u zhvilluar veprimtari të kundërligjshme, konkretisht organizimi i skemave piramidale dhe bixhozit të paligjshëm. Njësinë e hetimeve e stacionit policor Zubin Potok, me asistimin e njësive relevante të DRP Mitrovicë Veri, ka bërë bastisjen në të tri lokalet””

Gjatë bastisjeve, policia ka gjetur pajisje teknologjike të përdorura për lojëra fati.

““Në të tri lokacionet janë hasur pajisje teknologjike të cilat mundësonin zhvillimin e lojërave të fatit””

Në lidhje me rastin janë identifikuar pesë persona të dyshuar: tre janë hasur në vendngjarje dhe po intervistohen, ndërsa dy të tjerë nuk janë gjetur por janë të njohur për policinë. Gjithashtu janë intervistuar pesë dëshmitarë.

““Janë të dyshuar pesë persona, ku tre prej tyre janë hasur në vendngjarje dhe janë duke u intervistuar, ndërsa dy të tjerë nuk janë hasur aty, por janë të njohur për policinë””

Prokurori kujdestar është njoftuar dhe ka dhënë udhëzime për hapjen e tre rasteve penale.

““Është njoftuar prokurori kujdestar, i cili ka udhëzuar që të inicohen tri raste ‘Organizimi i skemave piramidale dhe bixhozit të paligjshëm’, të sanksionuara me nenin 294 të KPRK-së””

Aksioni vazhdon të zhvillohet dhe priten zhvillime të reja.