Anulohet seanca në rastin e “53-milionëshit”, shkak mospërfundimi i ekspertizës financiare
Seanca e rigjykimit ndaj Pal Lekajt dhe të tjerëve në rastin e autostradës “Arbën Xhaferi” është anuluar për shkak të mungesës së ekspertizës financiare.
Anulohet seanca në rastin e “53-milionëshit”, shkak mospërfundimi i ekspertizës financiare
Seanca e paraparë për të hënën në Gjykatën Themelore në Prishtinë, në kuadër të rigjykimit për rastin e njohur si “53-milionëshi”, është anuluar. Në këtë proces gjyqësor të akuzuar janë ish-ministri i Infrastrukturës, Pal Lekaj, bashkë me Eset Berishën, Nebih Shatrin dhe Besim Tahirin.
Arsyeja e këtij anulimi, siç u konfirmua nga zyra e gjykatëses Violeta Namani-Hajra, është mospërfundimi i ekspertizës financiare, dokument ky kyç për vazhdimin e procedurës. Seanca e radhës pritet të caktohet vetëm pasi Gjykata të pranojë zyrtarisht këtë ekspertizë.
Akuzat dhe vendimet e kaluara
Ish-ministri Pal Lekaj ngarkohet për keqpërdorim të detyrës zyrtare lidhur me ndarjen e 53 milionë eurove për konsorciumin “Bechtel & Enka”, për ndërtimin e autostradës “Arbën Xhaferi” (Prishtinë – Hani i Elezit). Së bashku me të, akuzohen edhe Eset Berisha (ish-këshilltar), Nebih Shatri (ish-sekretar i MI) dhe Besim Tahiri (ish-drejtor i Prokurimit).
“Pal Lekaj ishte dënuar fillimisht me 3 vite e 8 muaj burgim efektiv, dënim i cili u anulua më pas nga Gjykata e Apelit duke e kthyer lëndën në rigjykim.”
Në janar të vitit 2024, Gjykata Themelore i kishte shpallur fajtorë të katërt të akuzuarit, duke i dënuar me gjithsej 10 vjet e 3 muaj burgim. Megjithatë, pas ankesave, Gjykata e Apelit vendosi që rasti të kthehet edhe një herë në pikën zero për rigjykim.
Gjatë këtij rigjykimi, i akuzuari Eset Berisha kishte kërkuar përjashtimin e kryetares së trupit gjykues, por kjo kërkesë u refuzua nga kryetarja e Gjykatës Themelore, Albina Shabani-Rama.
