Mustafa: Kriza energjetike, rezultat i keqmenaxhimit të Qeverisë Kurti – PDK inicon komision hetimor

Anëtari i kryesisë së Partisë Demokratike të Kosovës (PDK), Arben Mustafa, në një konferencë për media ka deklaruar se kriza energjetike që po përballon vendi, me reduktimet e shpeshta të energjisë elektrike, është rezultat direkt i keqmenaxhimit të sektorit të energjisë nga Qeveria Kurti.

Mustafa theksoi se kjo barrë po bie mbi shpatullat e familjeve dhe bizneseve, të cilat po paguajnë fatura të larta, por mbeten pa furnizim të qëndrueshëm energjetik.

““Kosova sot po përballet me një krizë serioze energjetike, të shoqëruar me reduktime të shpeshta të energjisë elektrike në të gjithë territorin e saj. [...] Kjo krizë nuk ka ardhur rastësisht. Kjo krizë është pasojë direkte e një keqmenaxhimi pesëvjeçar, të papërgjegjshëm dhe pa vizion, të sektorit të energjisë nga kjo Qeveri”.”

PDK shpreh solidaritet me qytetarët që po vuajnë nga këto reduktime në temperatura të ulëta. Mustafa kritikoi mungesën e prodhimit vendor dhe rritjen e importit të shtrenjtë të energjisë.

““Përveç dështimit për të siguruar prodhim të mjaftueshëm vendor të energjisë elektrike, Kosova është detyruar të rrisë ndjeshëm importin e energjisë, i cili po realizohet me çmime jashtëzakonisht të larta dhe në dëm të interesit publik”.”

Ai kërkoi masa emergjente nga Qeveria, transparencë në kontratat e importit dhe një plan serioz për sigurinë energjetike. Gjithashtu, Mustafa u shpreh i shqetësuar për aferat dhe dyshimet për korrupsion në sektorin e energjisë, të cilat nuk kanë marrë llogari.

Paralajmëroi se me konstituimin e Kuvendit të ri, PDK do të iniciojë themelimin e një komisioni parlamentar hetimor për zbardhjen e aferave dhe keqmenaxhimit në sektorin e energjisë.

““Qëllimi ynë është i qartë: zbardhja e të vërtetës, përcaktimi i përgjegjësisë politike dhe institucionale, dhe garantimi i transparencës dhe llogaridhënies ndaj qytetarëve të Kosovës.””