Arrestohen dy persona në Gjilan për keqpërdorim të detyrës zyrtare: Bibliotekisti përfiton mbi 19 mijë euro pa shkuar fare në punë
Drejtoria për Hetimin e Krimeve Ekonomike dhe Korrupsionit (DHKEK) në Gjilan ka arrestuar një bibliotekist dhe një zyrtar për keqpërdorim të pozitës. Bibliotekisti ka përfituar 19,067.69 euro nga buxheti shtetëror pa paraqitur në punë nga 2023 deri në tetor 2025.
Arrestohen dy të dyshuar në Gjilan për keqpërdorim të detyrës zyrtare
Policia e Kosovës, përmes Drejtorisë për Hetimin e Krimeve Ekonomike dhe Korrupsionit (DHKEK) në Gjilan, ka siguruar prova të mjaftueshme për arrestimin e dy personave të dyshuar për veprën penale "Keqpërdorim i pozitës apo autoritetit zyrtar".
I dyshuari i parë, një mashkull kosovar i emëruar si bibliotekist në një shkollë me kontratë pune për kohë të pacaktuar, nuk është paraqitur në vendin e punës për një periudhë të gjatë, por ka vazhduar të përfitonte pagën mujore nga buxheti i Republikës së Kosovës.
Gjatë periudhës nga viti 2023 deri në tetor 2025, ai ka dëmtuar buxhetin publik në vlerë prej 19,067.69 eurove.
“Në periudhën kohore prej vitit 2023 e deri në Tetor të vitit 2025, i dyshuari i lartcekur ka dëmtuar buxhetin në vlerë prej 19,067.69 euro.”
I dyshuari i dytë, gjithashtu mashkull kosovar në cilësinë e zyrtarit, nuk ka raportuar mungesën e bibliotekistit pranë autoriteteve kompetente, duke mundësuar kështu vazhdimin e pagesave të pabaza ligjore.
Të dy të dyshuarit janë intervistuar në prani të avokatëve të tyre dhe me vendim të Prokurorisë kompetente janë ndaluar për 48 orë.
Hetimet po vazhdojnë në bashkëpunim me Prokurorinë për zbardhjen e plotë të rastit.
