Avdullah Hoti pranon përgjegjësi për rezultatet e dobëta të LDK-së në zgjedhjet e 2021 dhe 2025

Kandidati për kryetar të Lidhjes Demokratike të Kosovës (LDK), Avdullah Hoti, ka folur hapur për përgjegjësinë e tij dhe të partisë për rezultatet jo të kënaqshme në zgjedhjet parlamentare të vitit 2021 dhe ato të fundit të vitit 2025.

Gjatë një apariute në emisionin Rubikon të Klan Kosovës, Hoti theksoi se ai personalisht mban përgjegjësi për këto rezultate, siç kishte ndodhur edhe më parë.

“Sigurisht që kam pasë përgjegjësi edhe unë, edhe atëherë edhe tash kam përgjegjësi.”

Duke iu referuar zgjedhjeve të vitit 2021, kur ai ishte kandidat për kryeministër, Hoti rikujtoi se atëherë kryetari i LDK-së kishte dhënë dorëheqje, duke krijuar një standard për marrjen e përgjegjësisë në parti.

“Ne nuk jemi duke e vënë para një trupi gjykues kryetarin e LDK-së, ne duhet të mësohemi me standardin që është vendosur në vitin 2021, kryetari i LDK-së ka marrë përsipër rezultatin që kemi pasur atëherë dhe ka dhënë dorëheqje.”

Sipas Hotit, përgjegjësia për çdo rezultat zgjedhor fillon nga kryetari i partisë dhe shkon deri te anëtarët e nëndegëve, por kryetari drejton politikat dhe mban përgjegjësinë kryesore.

“Në çdo rezultat zgjedhor përgjegjësi kanë, duke filluar prej kryetarit të partisë, e deri te anëtari i kryesisë së nëndegës, të gjithë kanë përgjegjësi në krejt këtë zinxhir të strukturës hierarkike të LDK-së, dikush më shumë, dikush më pak, por drejtimin e politikave të LDK-së ia jep kryetari dhe në fund përgjegjësia shkon te kryetari i LDK-së.”

Kjo deklaratë vjen në kontekstin e garës për kreun e LDK-së, ku Hoti është një nga kandidatët kryesorë pas dorëheqjes së Lumit Abdixhiku.

Përgjegjësia hierarkike në LDK

LDK ka krijuar një kulturë të brendshme ku liderët marrin përgjegjësi për dështimet, siç tregoi rasti i 2021-ës. Hoti thekson se kjo duhet të jetë standard për të gjithë strukturën partiake.