Avdullah Hoti premton rikthimin e të larguarve nga LDK-ja: Mund t’i bashkoj copat e partisë

Avdullah Hoti ka konfirmuar sërish ambicien për t’u kandiduar për kryetar të Lidhjes Demokratike të Kosovës (LDK), duke premtuar rikthimin e unitetit brenda partisë.

Në një intervistë të dhënë për Klan Kosova, Hoti u shpreh i bindur se mund ta rikthejë unitetin, duke përfshirë rikthimin e anëtarëve dhe strukturave të larguara nga LDK-ja gjatë viteve.

““Aty janë të gjithë, por nuk janë, si me thënë, në mënyrë funksionale duke bashkëvepruar për të prodhuar një rezultat në këtë drejtim””

Sipas tij, të gjithë akterët politikë janë ende pjesë e LDK-së, por mungon funksionaliteti dhe bashkëveprimi për të arritur rezultate konkrete.

Kjo deklaratë vjen në prag të Kuvendit të jashtëzakonshëm të LDK-së më 31 janar, ku pritet të vendoset për drejtimin e ardhshëm të partisë dhe nëse kryetari aktual Lumir Abdixhiku do të vazhdojë në krye.

LDK-ja po kalon një krizë të brendshme pas rezultateve të dobëta në zgjedhjet e fundit, me debate të ashpra për liderinë dhe reformën e partisë. Hoti shihet si një nga kandidatët kryesorë për ta marrë postin.