BE-ja paralajmëron Trumpin: Evropa ka mjete të forta për të mbrojtur interesat e saj

Shefja e politikës së jashtme të Bashkimit Evropian, Kaja Kallas, ka dhënë një paralajmërim të qartë ndaj presidentit amerikan Donald Trump. Ajo ka theksuar se Evropa nuk do të lëshohet para kërcënimeve me tarifa dhe ka një sërë mjetesh për të mbrojtur interesat e saj ekonomike.

Takimi i Kallas-it sot në Bruksel me ministrin e Mbrojtjes të Danimarkës dhe ministrin e Jashtëm të Grenlandës erdhi në kontekstin e diskutimeve për sigurinë e Arktikut. Pas takimit, ajo shkroi në platformën X: "Siguria e Arktikut është një interes i përbashkët transatlantik dhe një që mund ta diskutojmë me aleatët tanë amerikanë".

“Kërcënimet tarifore nuk janë mënyra për ta bërë këtë. Sovraniteti nuk është për tregti. Ne nuk kemi interes të fillojmë një luftë, por do të mbajmë qëndrimin tonë. Evropa ka një gamë mjetesh për të mbrojtur interesat e saj.”

Kallas ka aluduar ndaj instrumentit anti-shtrëngim të BE-së, një mjet i pashfrytëzuar deri tani, i cili lejon vendosjen e tarifave hakmarrëse ndaj SHBA-së, kufizimin e investimeve amerikane dhe pengesën e qasjes në tregun e vetëm evropian. Kjo vjen në mes të tensionit rreth propozimeve të Trump-it për tarifa të larta ndaj importeve evropiane, të lidhura me mosmarrëveshjet për Grenlandën dhe sigurinë transatlantike.

Tensionet tregtare mes BE-së dhe SHBA-së mund të ketë pasoja të mëdha për ekonominë globale, veçanërisht nëse aktivizohet ky instrument i ri. Kallas theksoi se Evropa preferon dialogun, por është e gatshme për masa kundërmasa.