Bekim Jashari emocionon me urimin për fejesën e Hamzës së ri: Edhe në mes të betejës tre-ditore, kënga nuk pushoi kurrë

Bekim Jashari, anëtar i familjes heroike të Prekazit, ka publikuar një mesazh të mbushur me emocione dhe krenari për fejesën e djalit të tij, Hamzës, i cili mban emrin e gjyshit legjendar Hamëz Jashari.

Në postimin e tij në rrjetet sociale, Jashari e quan këtë event si "triumfin e dytë të familjes", pas betejës epike të vitit 1998 ku familja Jashari dha kushtrimin për liri kundër forcave serbe.

"Edhe në mes të betejës tre-ditore, kënga nuk pushoi kurrë", shkruan ai, duke rikujtuar shpirtin e pathyeshëm të heronjve Shaban, Adem dhe Hamëz Jashari.

“Në ditën që shënon triumfin e dytë të familjes sonë, pas ballafaqimit për ruajtjen e pragut të shtëpisë dhe dhënien e kushtrimit se armiku i ka ditët e numëruara në këtë tokë që, siç thoshte babushi, “veç këmbën e shqiptarit e duron” , familja jonë po rritet dhe po begatohet çdo ditë. Hamëza, që mban me krenari emrin e babushit, u fejua me Enesa Imeri, në Kosovën e lirë, këtë Kosovë që u ndërtua mbi themele të forta, themele që u hodhën para së gjithash nga të rinjtë dëshmorë të cilët sakrifica për liri i bëri të pavdekshëm. Gëzime të tilla në familjen tonë na zgjojnë kujtimin e babës Shaban, Kryekomandantit Ademit dhe Babushit, që betejën për liri e kthyen në dasmë përjetësie. Edhe në mes të betejës tre-ditore, kënga nuk pushoi kurrë. Hamëz dhe Enesa, urime fejesa. Ju urojmë jetë të gjatë, të mbushur me dashuri, lumturi dhe harmoni!”

Fotografitë shoqëruese tregojnë çiftin e ri pranë varrezave të dëshmorëve dhe shtëpisë-muze të familjes Jashari, duke nxjerrë në pah lidhjen e fortë me trashëgiminë historike.

Kjo ngjarje pozitive rikujton rolin e familjes Jashari në historinë e Kosovës dhe shpresën për brezat e ardhshëm në një vend të lirë dhe të zhvilluar.