Eugen Cakolli mbron Kushtrim Sadikun: Kritikat selektive ndaj dokumentarit për 7 tetorin në Izrael janë të padrejta

Eugen Cakolli, figurë e njohur nga shoqëria civile, ka dalë hapur në mbrojtje të gazetarit Kushtrim B. Sadiku, i cili ka marrë kritika të shumta për dokumentarin e tij të titulluar “Dhimbja që nuk harrohet”. Ky dokumentar fokusohet në ngjarjet tragjike të 7 tetorit në Izrael.

Cakolli e ka vlerësuar lart realizimin e këtij dokumentari, duke e cilësuar atë si një punë të jashtëzakonshme që trajton në mënyrë të drejtpërdrejtë dhe njerëzore vuajtjet e viktimave civile izraelite atë ditë. Ai thekson se dokumentari nuk pretendon të shpjegojë të gjithë konfliktin izraelito-palestinez apo të bëjë një bilanc të plotë të viktimave, por ndalon në një ngjarje specifike.

“Dokumentari nuk hyn në analiza politike apo historike, por përmend edhe viktimat palestineze. Kërkesat që ai të përfshijë domosdoshmërisht zhvillimet në Gaza apo kontekstin e plotë janë të pabaza”, ka thënë Cakolli.

Cakolli ka krahasuar këtë situatë me një dokumentar për sulmet e 11 shtatorit 2001 në SHBA, duke pyetur nëse ai do të duhej të trajtonte edhe luftërat pasuese në Lindjen e Mesme për të qenë ‘i plotë’. “Trajtimi i një krimi nuk nënkupton mohimin e tjetrit. Fokusimi në vuajtjen e izraelitëve nuk e mohon atë të palestinezëve”, shton ai.

Sipas tij, shumë kritika nuk bazohen në fakte, por në pyetjen pse flitet për njërën palë e jo për tjetrën, shpesh të ndikuara nga identiteti, feja apo bindjet politike. Cakolli kërkon që empatia të jetë e pastër, pa filtra politikë.

“Fakti që dokumentari nuk trajton gjithçka nuk e bën propagandë, por një shprehje të ndershme njerëzore”, përfundoi Cakolli, duke ftuar për reflektim mbi reagimet selektive.