PËRDITËSIM: Protesta e 17 shkurtit, Hoxha: Festë por edhe peng për mungesën e çlirimtarëve

Platforma qytetare “Liria ka emër” ka paralajmëruar një protestë të madhe më 17 shkurt në Prishtinë, në Ditën e Pavarësisë së Kosovës, për të kërkuar drejtësi për ish-krerët e UÇK-së të cilët po mbahen në paraburgim në Hagë prej pesë vitesh.

E ftuar në emisionin “Edicioni Special” në Klan Kosova, Eliza Hoxha ka shpjeguar pse është zgjedhur pikërisht kjo datë e rëndësishme.

“Prandaj është zgjedhur 17 shkurti. Është festë për të gjithë ne, por edhe një peng, sepse nuk i kemi njerëzit kryesorë në Kosovë.”

Ajo ka theksuar se protesta ka edhe karakter përkujtimor, duke kujtuar rolin e atyre që po vuajnë paraburgim në proceset kyçe të shtetndërimit të Kosovës.

“Është një përkujtim sepse atje mbahen peng njerëz që kanë luftuar për lirinë tonë dhe që kanë qenë të pranishëm në shpalljen e pavarësisë, si dhe kanë kontribuar në ndërtimin e institucioneve të shtetit. Prandaj, është peng që një garniturë e aktorëve kryesorë, që kanë udhëhequr proceset fillestare të shtetit të Kosovës, mungojnë.”

Më herët, në konferencën për shtyp, platforma “Liria ka emër” ka shpallur protestën me moton “Drejtësi, jo politikë”, duke ngritur dyshime për paanshmërinë e procesit në Hagë.

Konteksti i procesit në Hagë

Ish-krerët e UÇK-së, Hashim Thaçi, Kadri Veseli, Jakup Krasniqi dhe Rexhep Selimi janë në paraburgim prej nëntorit 2020. Gjykimi nisi më 3 prill 2023 dhe është në fazën përfundimtare, me deklarimet përmbyllëse nga 9 deri më 18 shkurt.

Akuza nga Zyra e Prokurorit të Specializuar janë mohuar plotësisht nga të akuzuarit dhe mbrojtja e tyre. Platforma “Liria ka emër” dhe figura si Hoxha kërkojnë drejtësi reale pa ndikim politik.