Dy mjekë specialistë ORL në Spitalin e Mitrovicës kryejnë mbi 400 operacione në 2025

Dy mjekë specialistë të Repartit të Otorinolaringologjisë (ORL) në Spitalin e Përgjithshëm të Mitrovicës, Dr. Arben Kastrati dhe Dr. Artan Haxhiu, kanë shënuar rezultate impresionuese gjatë vitit 2025.

Sipas të dhënave zyrtare nga institucioni, gjatë këtij viti janë kryer gjithsej 425 ndërhyrje kirurgjikale në fushën e ORL-së, ndërsa janë ofruar edhe rreth 10,600 vizita ambulantore për pacientët e zonës.

Këto shërbime janë realizuar me mbështetjen e plotë të Shërbimit të Anestezionit, ekipit të instrumentarëve dhe infermierëve, të cilët kanë luajtur një rol kyç në sigurimin e kujdesit të vazhdueshëm dhe të cilësisë së lartë shëndetësore.

“Nga spitali vlerësohet angazhimi profesional i mjekëve dhe stafit mbështetës, duke theksuar rëndësinë e bashkëpunimit ekipor në përmbushjen e nevojave shëndetësore të qytetarëve.”

Ky sukses thekson përkushtimin e stafit mjekësor në Mitrovicë për të ofruar shërbime të avancuara shëndetësore, duke kontribuar në përmirësimin e sistemit shëndetësor në të gjithë Kosovën. Arritjet e tyre shërbejnë si shembull frymëzues për të gjithë profesionistët e shëndetësisë.