Enver Hasani: 300-400 milionë para 'nën dorë' shpjegojnë rritjen e votave në zgjedhjet e 28 dhjetorit

Enver Hasani insiston në lidhje mes rezultatit të zgjedhjeve dhe parave 'nën dorë'

Ish-kryetari i Gjykatës Kushtetuese, Enver Hasani, ka deklaruar se rezultati i zgjedhjeve të 28 dhjetorit nuk mund të shpjegohet racionalisht pa marrë parasysh shpërndarjen e parave të fshehta.

“Rezultati i fundit zgjedhor, po të ishte racional siç e interpretojnë atëherë votuesi do të ishte i përndritur dhe shumë racion dhe unë jam i bindur që përmbi 300-400 milionë që janë dhënë, është faktori kryesor që ka bë diferencën në rritjen e votës.”

Hasani e bëri këtë deklaratë në emisionin “Këndi i Debatit” në Tevë1, duke theksuar se nuk ka pasur zhvillime shoqërore të tjera nga shkurt në dhjetor që të shpjegojnë rritjen e votave për disa subjekte politike.

Ai vuri në dukje se rritja prej rreth 10 për qind ose më shumë në shifra absolute është e pashpjegueshme pa përfshirjen e mjeteve financiare të fshehta, përveç atyre publike.

“Në Mitrovicë janë gjithnjë, dhe këtë më kanë thënë njerëzit akraba e familjarë...”

Hasani përmendi shembuj konkretë nga Mitrovica, bazuar në dëshmitë e të afërmve të tij, duke thënë se pretendimet për shpërndarje parash duhet të hetohen nga organet kompetente.

Ai hodhi poshtë narrativat që lidhin rezultatin me heqjen e sanksioneve apo dialogun strategjik, duke i quajtur ato çështje elitare që nuk ndikojnë te votuesi i thjeshtë.

“Po të thuash që vota është fituar se janë hequr sanksionet, ju e dini që këtu nuk ka pasur asnjë ndjeshmëri për sanksione...”

Deklaratat e tij vijnë në një kohë kur procesi zgjedhor vazhdon të jetë subjekt diskutimesh, me akuza të shumta për parregullsi.

Burimi: Nacionale