Erërat e forta shkaktojnë rënie fasadash dhe kulmesh në Dardania, intervenon emergjenca në Prishtinë

Drejtoria për Siguri dhe Emergjenca e Kryeqytetit ka njoftuar se ka filluar intervenimet e menjëhershme për largimin e rrezikut në ndërtesat e banimit në lagjen Dardania dhe zona të tjera të Prishtinës, pas rënies së pjesëve të fasadave dhe kulmeve për shkak të erërave të forta.

Ekipet e kësaj drejtorie, në bashkëpunim me shërbimet përkatëse, po kryejnë intervenime teknike të specializuara për të parandaluar rrezikun potencial për kalimtarët dhe banorët.

“Angazhimi ynë është i vazhdueshëm dhe i përqendruar në identifikimin e rreziqeve, largimin e elementeve të pasigurta nga objektet, dhe rritjen e sigurisë në hapësirat publike.”

Siguria e qytetarëve mbetet prioritet absolut. Drejtoria do të vazhdojë monitorimin aktiv dhe reagimin e shpejtë në çdo rast rreziku potencial.

Qytetarët ftohen të raportojnë çdo shqetësim përmes numrave emergjentë: 0800 122 44 ose 0800 122 33.

Ndryshe, Komuna e Prishtinës kishte paralajmëruar për erëra të forta gjatë të dielës, duke bërë apel për kujdes të shtuar.

Si të veproni në kushte të tilla

• Shmangni zonat me ndërtesa të vjetra ose të pa mirëmbajtura
• Mos afrohuni pranë fasadave ose kulmeve të dëmtuara
• Raportoni menjëherë rreziqet në numrat e emergjencës
• Qëndroni të informuar për paralajmërimet e motit