Faji, emocioni më toksik për shëndetin: Pse na pengon të jemi të lumtur dhe si ta menaxhojmë
Psikiatrja spanjolle Marian Rojas Estapé shpjegon pse faji është emocioni më shkatërrues për shëndetin mendor, si na lidh me të kaluarën dhe pengon vendimmarrjen, duke ofruar hapa praktikë për ta transformuar atë në rritje personale.
Faji, emocioni më toksik për shëndetin
Ai ju bllokon, ju shteron energjinë dhe ju mban të ngujuar në gabimet e së kaluarës. Psikiatrja spanjolle Marian Rojas Estapé ka identifikuar fajin si një nga emocionet më të dëmshme për shëndetin mendor dhe fizik, duke shpjeguar në një intervistë për La Razón pse ky ndjenjë na pengon të jemi të lumtur.
"Faji është një emocion toksik që na lidh me të kaluarën dhe na pengon të ecim përpara", thekson Estapé. Ky emocion lind pas gabimeve, pritshmërive të paplotësuara ose kritikave nga të tjerët, duke u ushqyer nga vetëkritika e tepruar ose mjedisi.
“Faji vjedh energjinë, e vështirëson marrjen e vendimeve dhe mund të çojë në gjendje të thella emocionale negative.”
Nëse nuk trajtohet, faji zë hapësirë të madhe mendore, duke shkaktuar depresion dhe duke na mbajtur peng të së kaluarës në vend të të tashmes.
Si shfaqet faji dhe pse është kaq i rrezikshëm?
Faji shfaqet kur ndihemi se nuk kemi vepruar siç duhet ose nuk kemi përmbushur pritshmëritë. Problemi lind kur ky emocion bëhet rreth vicioz: sa më shumë e rishqyrttojmë gabimin, aq më fort bëhet, duke na tërhequr prapa.
Sipas ekspertes, faji pengon çdo ndryshim pozitiv, duke na mbajtur në një cikël negativ që ndikon në vendimmarrje dhe energji emocionale.
Hapa praktikë për ta menaxhuar fajin
- Emërtoni atë që ndodhi, pa dramatizim. Çfarë bëra? Kë e preku? Çfarë është në fuqinë time?
- Rregulloni atë që mundeni. Një kërkim faljeje konkret, korrigjim gabimi ose dëmshpërblim.
- Nxirrni një mësim praktik. Çfarë do të bëj ndryshe herën tjetër?
- Ndërprisni rikthimin e vazhdueshëm te mendimet negative. Nëse keni marrë përgjegjësi dhe keni vepruar, kthehuni te e tashmja.
"Faji nuk ndërton, por mund të bëhet pikënisje për ndryshim", porosit Estapé. Duke mbyllur llogaritë me të kaluarën, ne rikthejmë energjinë në të tashmen dhe transformojmë gabimet në shtysa për rritje.
Kjo analizë vjen nga një intervistë e fundit e psikiatres në La Razón, transmetuar nga Telegrafi.