Musliu: Përçarja e popullit nuk erdhi vetvetiu, është pasojë e politikës së fëlliqur dhe gjuhës së urrejtjes

Deputetja e Partisë Demokratike të Kosovës (PDK), Ganimete Musliu, ka reaguar ashpër ndaj një imazhi fyes që po qarkullon në rrjetet sociale lidhur me vërshimet e fundit në komunën e Skenderajt. Musliu vlerëson se gjuha e urrejtjes dhe mungesa e empatisë nuk janë të rastësishme, por produkt i një politike të ndjekur ndër vite.

Në reagimin e saj, Musliu i referohet një fotografie të vërshimeve ku dikush kishte shkruar mbishkrimin e ulët “Cofni tash”. Sipas deputetes, ky nuk është thjesht një postim i izoluar, por pasojë e një urrejtjeje të kultivuar me vetëdije.

“Politika e fëlliqur” si mjet për pushtet

“Populli ynë nuk u përça vetë. Ai u përça nga politika e fëlliqur, nga individë që jetuan duke mbjellë ndarje për të fituar pushtet, ndikim dhe vëmendje,” ka shkruar Musliu në profilin e saj.

“Politikanë të dështuar, zëra të papërgjegjshëm dhe individë pa busull morale, që urrejtjen e përdorën si mjet për pushtet dhe klikime. Ata që e normalizuan talljen, e ushqyen cinizmin dhe e vranë empatinë derisa sot një fatkeqësi quhet 'humor'.”

Ajo ka akuzuar këta individë se e kanë kthyer talljen në armë dhe se fatkeqësinë e tjetrit e shohin vetëm si kapital politik e moral. Sipas saj, frytet e kësaj përçarjeje po shihen sot përmes përbuzjes rajonale dhe etiketimit fyes që është bërë "normale".

Nevojë për pastrim moral

Në fund të reagimit të saj, deputetja e PDK-së bëri thirrje për një ndryshim të qasjes shoqërore dhe politike ndaj gjuhës së përdorur në sferën publike.

“Ky popull nuk ka nevojë për më shumë përbuzje, por për një pastrim moral nga gjuha e urrejtjes që na është shitur si guxim,” përfundoi Musliu.