Gjermania rikonfirmon mbështetjen për FSK-në: Bottcher takohet me komandantin Bashkim Jashari

Komandanti i Forcës së Sigurisë së Kosovës (FSK), Gjenerallejtënant Bashkim Jashari, ka pritur në një takim zëvendësambasadorin e Gjermanisë në Kosovë, Christian Bottcher. Takimi u fokusua në procesin e transformimit të FSK-së dhe forcimin e bashkëpunimit dypalësh në fushën e sigurisë.

Sipas njoftimit zyrtar nga Ambasada Gjermane, gjatë diskutimit u rrahën çështje kyçe që lidhen me të ardhmen e forcës kosovare dhe rrugëtimin e saj drejt standardeve të larta profesionale. Komandanti Jashari shprehu mirënjohje të thellë për ndihmën dhe mbështetjen e vazhdueshme që Gjermania ka ofruar ndër vite për zhvillimin e kapaciteteve të FSK-së.

“Gjermania është e përkushtuar ta shohë Kosovën dhe institucionet e saj të sigurisë si pjesë të një arkitekture të përbashkët dhe të integruar evropiane të sigurisë.”

Nga ana e tij, zëvendësambasadori Bottcher rikonfirmoi se Berlini zyrtar do të mbetet një partner i palëkundur i Kosovës. Ai vlerësoi lart bashkëpunimin konstruktiv me FSK-në dhe theksoi rëndësinë e integrimit të institucioneve të sigurisë në strukturat evropiane.

Gjermania mbetet një nga investitorët kryesorë në trajnimin dhe pajisjen e FSK-së, duke luajtur një rol kyç në përgatitjen e forcës për objektivat e saj strategjike.