Gjykata franceze konfirmon burgim të përjetshëm për Liridon Berishën: Vrasje brutale e partneres para syve të fëmijës

Gjykata e Krimeve të Rënda e Meurthe-et-Moselle në Francë ka konfirmuar dënimin me burgim të përjetshëm për Liridon Berishën, një 27-vjeçar nga Kosova, për vrasjen e partneres së tij, Stephanie Di Vincenzo. Ngjarja e rëndë ndodhi në qershor 2021 në Hayange, ku viktima u godit me thikë para syve të vajzës së tyre 4-vjeçare.

Detajet e krimit të rëndë

Vrasja ndodhi natën mes 23 dhe 24 majit 2021. Stephanie, 22-vjeçe, iku nga shtëpia përmes dritares dhe kërkoi ndihmë te komisariati policor, vetëm 45 metra larg. Partneri i saj e ndoqi dhe e masakroi me thikë në rrugë, në prani të fqinjëve dhe vajzës së vogël.

“"As prania e dëshmitarëve dhe as ajo e vajzës së tij nuk e penguan të vazhdonte aktin. Si në korrida, ai e ka shpuar për ta dobësuar para se t’ia merrte jetën, e më pas ka pështyrë mbi trupin e saj."”

Prokurori i përgjithshëm, Nicolas Burkel, e cilësoi aktin si “jashtë normale për nga dhuna” dhe kërkoi konfirmimin e dënimit të shkallës së parë, duke e quajtur atë një “dënim të eliminimit shoqëror”.

Dënimi dhe historia e çiftit

Në shkallën e parë, më 2024, Berisha u dënua me burgim të përjetshëm dhe 22 vite pa lirim me kusht. Apeli uli periudhën në 18 vite. Avokati i të akuzuarit, Arnaud Blanc, përmendi sfondin e Berishës: lindur në 1998 gjatë luftës në Kosovë dhe i vendosur nën kujdes në Francë për shkak të traumave familjare.

Të paktën 10 herë policia kishte ndërhyrë në shtëpinë e çiftit para incidentit. Pak muaj më parë, viktima kishte bërë një kallëzim që nuk u trajtua siç duhet.

Burimi: IndeksOnline / AFP, transmetuar nga Klankosova.tv