Gjykimi i ish-krerëve të UÇK-së në Hagë hyn në fazën përfundimtare

Në Gjykatën Speciale të Hagës është përmbyllur afati për dorëzimin e dosjeve përfundimtare në rastin kundër ish-krerëve të Ushtrisë Çlirimtare të Kosovës (UÇK): Hashim Thaçi, Kadri Veseli, Jakup Krasniqi dhe Rexhep Selimi.

Nga 9 deri më 18 shkurt janë planifikuar fjalët përfundimtare të palëve, pas të cilave gjykata ka një afat prej tre muajsh për të lëshuar aktgjykimin e parë, me mundësi zgjatjeje deri në dy muaj të tjerë.

Pas më shumë se pesë vitesh proces gjyqësor, ky rast hyn në fazën vendimtare. Parashtrimet përfundimtare shënojnë fundin e analizës së provave të mbledhura gjatë gjykit.

“Një faktor vendimtar mbetet sfidimi dhe rrëzimi i provave nga Serbia, të cilat mbrojtja i konsideron thelbësisht të kontestuara për nga origjina dhe besueshmëria.”

Avokati i akredituar Skender Musa thekson rëndësinë e argumentimit të fortë të mbrojtjes në këtë fazë. Ai vlerëson se provat serbe, të përgatitura nga regjimi i Millosheviqit, mund të jenë falsifikuara dhe se krimet serbe mund të jenë atribuar gabimisht UÇK-së.

“Këto janë përgatitur nga regjimi i Millosheviqit, i cili kishte në dispozicion policinë dhe ushtrinë dhe mundësinë e falsifikimit të dokumenteve, provave materiale dhe video-incizimeve të ndryshme.”

Mbrojtja synon të demaskojë provat si të pabazuara, duke u mbështetur në gjendjen faktike në terren dhe mungesën e lidhjes direkte me akuzat kundër të pandehurve.

Ndërkohë, pritet aktgjykimi i parë deri në korrik 2026 më së voni. Në Prishtinë, më 17 shkurt është paralajmëruar një protestë tjetër kundër Gjykatës Speciale lidhur me trajtimin e ish-krerëve të UÇK-së.

Ky zhvillim vazhdon të ndjekë me vëmendje opinionin publik në Kosovë, ku procesi gjyqësor ka qenë subjekt i debateve të ashpra.