Hagë: Pranohet si provë intervista e Isni Kilajt gjatë bastisjes në shtëpinë e tij

Në çështjen gjyqësore kundër ish-presidentit Hashim Thaçi, Bashkim Smakaj, Fadil Fazliu, Isni Kilaj dhe Hajredin Kuçi për pengimin e administrimit të drejtësisë, gjykata ka pranuar si provë materiale një intervistë të dhënë nga Isni Kilaj për prokurorët gjatë bastisjes në vendbanimin e tij në Kosovë.

Kjo u bë e ditur nga zëdhënësi i Dhomave të Specializuara të Kosovës (DhSK) në Hagë, Michael Doyle, i cili shpjegoi se pranimi i kësaj prove erdhi si rezultat i një kërkeseje të Prokurorisë së Specializuar (ZPS).

““Në kohën e intervistës, z. Kilaj hoqi dorë nga e drejta e tij për të heshtur dhe nga e drejta për të pasur avokat të pranishëm gjatë intervistës.””

Doyle theksoi se para intervistës, ZPS-ja i kishte komunikuar Kilajt të gjitha të drejtat e tij si i dyshuar, si gojarisht ashtu edhe me shkrim në gjuhën shqipe. Kilaj kishte konfirmuar me nënshkrim se i kuptonte këto të drejta dhe ishte informuar se mund të tërhiqej në çdo kohë.

Mbrojtja e Kilajt kishte kundërshtuar pranimin e intervistës, duke pretenduar se ai nuk ishte informuar mjaftueshëm për veprat penale. Megjithatë, gjykatësi, duke u mbështetur në regjistrimin audio të intervistës, konstatoi se hetuesit kishin qenë të qartë lidhur me dyshimet dhe mundësinë e përdorimit të deklaratave kundër tij në gjykatë.

““Hetuesit paraqitën hapur në fillim të intervistës ‘arsyet e tyre për të besuar’ se z. Kilaj mund të ketë marrë pjesë në një vepër penale që përfshihet në juridiksionin e DhSK-së.””

Gjykatësi iu referua edhe jurisprudence-s së gjykatave ndërkombëtare dhe Gjykatës Evropiane për të Drejtat e Njeriut për të mbështetur vendimin e tij.

Në të njëjtën seancë, gjykata miratoi kërkesën e ZPS-së për shtimin e materialeve të reja provash të marra nga një institut dhe një kompani forenzike gjatë muajit të fundit. Këto do të dorëzohen mbrojtjes më 19 janar 2026.

Mbrojtja gjithashtu mori miratimin për të zgjeruar numrin e fjalëve në përgjigjen e saj ndaj mocionit të prokurorisë.

Doyle përmendi gjithashtu vazhdimin e paraburgimit për Hashim Thaçin, Kadri Veselin, Rexhep Selimin dhe Jakup Krasniqin.

Sipas tij, një ekip i programit për komunikim dhe ndërgjegjësim të DhSK-së po zhvillon aktivitete informative për studentët në Prishtinë rreth mandatit dhe proceseve gjyqësore.

DhSK-ja mban çdo të enjte në orën 14:30 informacione javore përmes platformës Zoom për zhvillimet më të reja në procedurat gjyqësore.