Hapet rruga Siboc-Palaj-Obiliq për qarkullimin e automjeteve

Komuna e Obiliqit ka njoftuar qytetarët se rruga që lidh Sibocin, Palajin dhe Obiliqin aktualisht është e kalueshme dhe e hapur për qarkullim. Pas një periudhe monitorimi, ekipet komunale kanë konfirmuar se situata në këtë aks rrugor është e sigurt për drejtuesit e automjeteve.

Sipas njoftimit zyrtar nga autoritetet lokale, ekipet përkatëse janë në terren dhe po monitorojnë vazhdimisht segmentin rrugor për të garantuar sigurinë e qarkullimit. “Rruga Siboc–Palaj–Obiliq është e kalueshme për automjete, ndërsa ekipet janë në terren dhe situata po përcillet vazhdimisht”, thuhet në komunikatën e Komunës së Obiliqit.

Autoritetet u kanë bërë thirrje të gjithë pjesëmarrësve në trafik që të vozisin me kujdes të shtuar dhe të respektojnë rregullat e sinjalistikës rrugore. Komuna është zotuar se do të njoftojë qytetarët me kohë për çdo ndryshim të mundshëm që mund të ndodhë në këtë aks.