Ramush Haradinaj takohet me ambasadorin e ri të Sllovenisë në Kosovë, diskutojnë zhvillimet politike

Kryetari i Aleancës për Ardhmërinë e Kosovës (AAK), Ramush Haradinaj, ka pritur në një takim njoftues ambasadorin e ri të Republikës së Sllovenisë në Kosovë, z. Borut Blaj.

Gjatë takimit, palët kanë biseduar për zhvillimet politike aktuale në Kosovë, sfidat me të cilat përballet vendi ynë, si dhe për forcimin e marrëdhënieve dypalëshe mes Kosovës dhe Sllovenisë.

Haradinaj ka theksuar se Sllovenia mbetet një partnere strategjike dhe mbështetëse e fuqishme e Kosovës në rrugën e saj drejt anëtarësimit në NATO dhe Bashkimin Evropian.

“I urova Ambasadorit Blaj mirëseardhje dhe suksese në misionin e tij, duke shprehur mirënjohje për mbështetjen e vazhdueshme të Sllovenisë ndaj Kosovës.”

Ky takim nxjerr në pah rëndësinë e bashkëpunimit me shtetet e Bashkimit Evropian, si Sllovenia, e cila ka qenë një nga vendet e para që njohu pavarësinë e Kosovës dhe vazhdon të mbështesë aspiratat euroatlantike të saj.

Marrëdhëniet bilaterale mes dy vendeve janë të ngrohta dhe të frytshme, me fokus të veçantë në forcimin e lidhjeve ekonomike, politike dhe kulturore.