Inaugurohet Premium Business Club në Rezidencën e Ambasadorit Gjerman në Kosovë

Oda Ekonomike Gjermano-Kosovare (OEGJK) ka zhvilluar ceremoninë solemne të inaugurimit të Premium Business Club në ambientet luksoze të Rezidencës së Ambasadorit Gjerman në Kosovë. Ky nismë shihet si një hap kyç drejt forcimit të bashkëpunimit ekonomik mes dy vendeve.

Në këtë ngjarje të rëndësishme kanë marrë pjesë udhëheqës të kompanive anëtare premium të OEGJK-së, anëtarët e Bordit Drejtues si dhe e gjithë ekipi i Odës. Prania e tyre nënvizon nivelin e lartë të besimit, partneritetit dhe angazhimit të qëndrueshëm në këtë komunitet biznesor.

Sipas njoftimit zyrtar të OEGJK-së, Premium Business Club është një platformë e veçantë e krijuar posaçërisht për kompanitë premium. Ajo synon të ofrojë mundësi të rrjetëzimit të targetuar, bashkëpunime konkrete dhe hapje të derës për mundësi të reja biznesi me partnerët gjermanë.

Kjo ceremoni inauguruese shënon fillimin zyrtar të funksionimit të klubit dhe vendos bazat për ndërtimin e një rrjeti biznesor më të fortë dhe më të ndikshëm në promovimin e zhvillimit ekonomik të Kosovës përmes lidhjeve me Gjermaninë.

/Burimi: Telegrafi/