Inflacioni në Kosovë arrin në 5.3% në dhjetor – Energjia dhe ushqimet me rritje rekorde
Inflacioni vjetor në Kosovë ka arritur në 5.3% në dhjetor 2025, i nxitur kryesisht nga shtrenjtimi i energjisë elektrike, ushqimeve dhe shërbimeve të transportit.
Rritje e çmimeve në fund të vitit 2025
Agjencia e Statistikave të Kosovës (ASK) ka publikuar raportin e fundit të Indeksit të Harmonizuar të Çmimeve të Konsumit (IHÇK) për muajin dhjetor 2025. Të dhënat tregojnë se inflacioni vjetor ka arritur në 5.3 për qind, duke shënuar një rritje të ndjeshme krahasuar me vitin paraprak.
Sipas ASK-së, vetëm brenda një muaji (nëntor-dhjetor 2025), çmimet janë rritur mesatarisht për 0.7 për qind. Ndërkaq, norma mesatare vjetore e inflacionit për tërë vitin 2025 është mbyllur në 3.9 për qind.
Çka u shtrenjtua më së shumti?
Rritja më e madhe e çmimeve gjatë dhjetorit 2025, krahasuar me dhjetorin 2024, u vërejt në kategoritë esenciale që prekin drejtpërdrejt xhepin e qytetarëve:
- Pemët: Rritje prej 19.0%
- Energjia elektrike: Rritje prej 18.3%
- Transporti: Shërbimet e lidhura me transportin personal u shtrenjtuan për 18.1%
- Mishi: Rritje prej 14.4%
Përveç këtyre, gjatë vitit 2025 rritje dyshifrore kanë shënuar edhe kafja, çaji dhe kakao (15.2%), si dhe pushimet e organizuara (10.3%). Rritje të ndjeshme u shënuan edhe te produktet e qumështit, vajrat ushqimore dhe shërbimet hoteliere.
Trendi mujor: Energjia dhe fluturimet udhëheqin rritjen
Në nivel mujor, nga nëntori në dhjetor 2025, hov rritjes i dhanë kryesisht energjia elektrike me 8.7% dhe biletat e fluturimeve me 8.4%. Gjithashtu, u vërejt shtrenjtim i lëndëve djegëse të ngurta (dru dhe pelet) për 3.0% dhe perimeve për 2.9%.
Në anën tjetër, e vetmja kategori që shënoi rënie ishin karburantet dhe lubrifikantët, duke pasur një ndikim zbutës në indeksin e përgjithshëm të çmimeve.
