Ish-gardiani i burgut të Prishtinës deklarohet i pafajshëm për krime lufte

I akuzuari Boban Toniq, i njohur me nofkën “Bellko”, është deklaruar i pafajshëm në Gjykatën Themelore të Prishtinës lidhur me akuzat për krime lufte si gardian në burgun e Prishtinës dhe paralelen në Lipjan gjatë luftës në Kosovë.

Prokurori special Atdhe Dema lexoi aktakuzën, ndërsa gjykatësi Rrahman Beqiri e njoftoi të akuzuarin me të drejtat e tij ligjore. Toniq, i shoqëruar nga avokati Predrag Milokoviq, mohoi të gjitha akuzat.

Detajet e aktakuzës

Sipas aktakuzës së ngritur më 31 dhjetor 2025 nga Prokuroria Speciale e Kosovës, Toniq akuzohet se në bashkëkryerje me ish-gardianët Jovan Jovanoviq, Avdia Sutkoviq dhe Zoran Gjokiq, kanë maltretuar sistematikisht të burgosurit shqiptarë duke shkelur rregullat e të drejtës ndërkombëtare humanitare.

“Të burgosurit ishin torturuar në mënyrë çnjerëzore me mjete të ndryshme si shkop gome, shufra metalike, shqelma e grushte deri në alivanosje.”

Aktakuza përshkruan se viktimat kanë vuajtur dhimbje të mëdha trupore dhe psikike, duke mbetur pa ngrënë për ditë të tëra, me ankth dhe frikë të vazhdueshme.

Ngjarja e 24 maj - 10 qershor 1999

Në pikën e dytë, Toniq akuzohet për keqtrajtimin e të burgosurve të transferuar nga burgu i Dubravës në Prishtinë dhe Lipjan. Pas formimit të një kordoni, ata u goditën me mjete të ndryshme dhe u torturuan sistematikisht, duke u lënë pa ushqim dhe duke u kërcënuar me vdekje.

Të akuzuarit ngarkohen me veprën penale “Krime lufte kundër popullatës civile” sipas nenit 142 të Ligjit Penal të ish-RSFJ-së.

Gjykatësi Beqiri njoftoi se në afat 20-ditor mund të kundërshtohen provat ose të kërkohet hudhja e aktakuzës.

Raportimi bazohet në lajmin e Indeks Online dhe Betimi për Drejtësi.