Java nis me ngrica të forta dhe temperatura të ulëta në Kosovë
Kosova do të nisë javën me kushte të ftohta, ku temperaturat minimale parashihen të zbresin deri në -9°C, shoqëruar me ngrica dhe mjegull që mund të krijojnë rreziqe në trafik.
Java nis me ngrica të forta dhe temperatura të ulëta në Kosovë
Mot i vranët me intervale dielli pritet të mbizotërojë në të gjithë territorin e Kosovës gjatë ditës së sotme. Gjatë mëngjesit, ngricat dhe mjegulla në disa zona do të krijojnë rreziqe për vozitësit, sidomos në rrugët malore dhe zonat me lagështi.
Autoritetet kanë bërë thirrje për kujdes të shtuar në trafik, duke theksuar rrezikun nga ngrica dhe mjegulla. Të enjten priten riga shiu në disa zona dhe fjolla bore në viset malore.
“Sot dita do të karakterizohet nga mot i vranët me intervale me diell. Ngrica do të jetë e pranishme në të gjithë territorin. Temperaturat minimale do sillen nga -9 deri në -7°, kurse ato maksimale nga -1 deri në 3°C.”
Temperaturat do të mbeten të ulëta gjatë gjithë ditës, veçanërisht në mëngjes dhe mbrëmje. Era do të fryjë nga veriperëndimi me shpejtësi 1-3 m/s.
Qytetarët inkurajohen të marrin masa paraprake si gomat dimërore dhe vozitje të kujdesshme për të shmangur aksidentet.
