Kamerat e sigurisë në Prishtinë rrisin efektivitetin e policisë në trafikun rrugor

Monitorimi përmes kamerave të sigurisë në kryeqytet po jep rezultate të mira. Sipas njësisë së trafikut rrugor, përditë ndëshkohen nga 50 deri në 100 kundërvajtës, ndërsa javën e fundit mbi 1300 persona kanë marrë gjoba.

Policia e Kosovës vazhdon të bëjë thirrje që shoferët të shmangin përdorimin e telefonit gjatë vozitjes dhe të respektojnë rregullat e trafikut për të parandaluar aksidentet dhe ruajtur jetën e qytetarëve.

Gjatë periudhës nga 13 deri më 19 janar 2026, janë shqiptuar 1369 gjoba, kryesisht për përdorim telefoni dhe shkelje të tjera të evidentuara nga kamerat.

““Gjobat variojnë, vetëm përmes kamerave, mund ta konfirmoj se diku prej 50- deri ne 100 gjoba brenda ditës, ky është trendi””

Vedat Zuka, shef i operativës së trafikut në Prishtinë, ka konfirmuar efektivitetin e kamerave: “Prej vendosjes së tyre e deri më tash, unë konsideroj që kanë qenë shumë efikase, kanë ndikuar jashtëzakonisht mirë edhe te populli...”

““Vendosja e kamerave, nëpër kryqëzime të rrugëve, ose edhe në semaforë, sigurisht që do ta japë edhe rezultate më të mëdha të sigurisë në komunikacion rrugor...””

““Funksionalizimi i kamerave është shumë i nevojshëm dhe shumë i mirë. Duhet të merren ato gabime që i bëjnë dhe t’iu shqiptohen dënime.””

Ekspertët e komunikacionit nënvizojnë se kamerat synojnë parandalimin e aksidenteve dhe presin rezultate pozitive në sigurinë e përgjithshme. Ata sugjerojnë gjoba më të larta dhe pa përjashtim.

Prishtina planifikon vendosjen e kamerave të sigurisë në shumë pjesë të tjera të qytetit për të rritur më tej sigurinë.