Kancelari gjerman: Anëtarësimi i Ukrainës në BE në vitin 2027 është jorealist

Kancelari i Gjermanisë, Friedrich Merz, ka deklaruar se anëtarësimi i Ukrainës në Bashkimin Evropian më 1 janar të vitit 2027 nuk është i mundur. Këto komente erdhën pas bisedimeve me partnerët e koalicionit në Berlin.

"Anëtarësimi më 1 janar 2027 është jashtë diskutimit. Nuk është i mundur", u shpreh Merz, sipas transmetimit të Telegrafit.

“Çdo vend që kërkon të anëtarësohet në BE duhet së pari të përmbushë kriteret e Kopenhagës, një proces që zakonisht zgjat disa vjet.”

Merz theksoi se Ukrainës i nevojitet një perspektivë e qartë afatgjatë për anëtarësim, por jo një rrugë të shpejtë. "Ne mund ta sjellim ngadalë Ukrainën më afër Bashkimit Evropian gjatë rrugës. Kjo është gjithmonë e mundur, por një anëtarësim kaq i shpejtë thjesht nuk është i realizueshëm", shtoi ai.

Sipas tij, prioritet aktual është përfundimi i luftës me Rusinë. Gjermania është në kontakt të ngushtë me SHBA-në dhe Ukrainën për bisedimet direkte midis Kievit dhe Moskës.

“Ne jemi në kontakt të ngushtë me delegacionet e SHBA-së dhe Ukrainës... Është mirë që tani po zhvillohen bisedime të drejtpërdrejta midis Ukrainës dhe Rusisë.”

Këto deklarata vijnë pas komenteve të Ministrit të Jashtëm gjerman Johann Wadephul, i cili tha se Ukraina meriton një shans të drejtë për anëtarësim në BE, por pa rrugë të shkurtra, ashtu si për vendet e Ballkanit Perëndimor.

Merz propozoi një perspektivë realiste si garanci sigurie për Ukrainën në këtë fazë të luftës.