KEK operon me pesë njësi prodhuese, prodhimi ditor tejkalon 20 mijë MWh

Korporata Energjetike e Kosovës (KEK) ka njoftuar se po operon njëkohësisht me pesë njësi prodhuese të energjisë elektrike. Ky operim i jashtëzakonshëm siguron prodhim stabil bruto ditor prej mbi 20 mijë megavat-orësh (MWh), në përputhje të plotë me parametrat teknikë.

Në kushte normale, KEK operon me katër njësi. Megjithatë, gjatë periudhave të temperaturave të ulëta, ka angazhuar maksimalisht edhe njësinë e pestë. Kështu, ka arritur operim me pesë njësi për nëntë ditë që nga 19 dhjetori 2025 dhe shtatë ditë në janar 2026, përfshirë edhe sot.

Rikthimi i Njësisë A4 dhe B1

Njësinë A4 e ka startuar gjatë orëve të mbrëmjes dhe e ka sinkronizuar me rrjetin në orët e para të mëngjesit. Rikthimi paralel dhe i suksesshëm i Njësisë B1 dhe A4 brenda afateve optimale dëshmon profesionalizmin e stafit teknik dhe menaxherial të KEK-ut.

Ky operim i qëndrueshëm siguron funksionim me kapacitete të plota të sistemit elektroenergjetik, duke reflektuar stabilitet teknik dhe performancë maksimale.

Përkushtim për modernizim

KEK thekson përkushtimin për operim të sigurt dhe efikas, menaxhim rigoroz të aseteve dhe avancim të projekteve strategjike të modernizimit për forcimin e sektorit energjetik në Kosovë.

/Bazuar në njoftimin zyrtar të KEK-ut via Telegrafi/