KESCO: Furnizimi me energji elektrike është stabilizuar, apel për kursim në orët e pikut
KESCO konfirmon stabilizimin e furnizimit me energji elektrike pas rikthimit të bllokut B1 dhe masave të marra për balancim. Megjithatë, kërkesa e lartë vazhdon të kërkojë importe dhe apelon për kursim energjie nga konsumatorët.
KESCO: Furnizimi me energji elektrike është stabilizuar
KESCO ka njoftuar konsumatorët se furnizimi me energji elektrike është stabilizuar plotësisht, pas normalizimit të gjendjes në sistemin elektroenergjetik dhe zbatimit të masave të koordinuara për balancimin e ngarkesës.
Rritja e prodhimit vendor ka luajtur rol kryesor në këtë zhvillim, veçanërisht pas kthimit në funksion të bllokut B1 të Termocentralit Kosova B. Kjo ka lehtësuar presionin në rrjet, por kërkesa për konsum mbetet e lartë.
Për të mbuluar deficitin, KESCO po vazhdon me importe energjie, pavarësisht sfidave në tregun rajonal ku kërkesa është e lartë për shkak të nevojave të shteteve fqinje.
“KESCO vazhdon të ndërmarrë të gjitha veprimet e nevojshme për të siguruar energji elektrike dhe për të mbajtur furnizimin sa më të qëndrueshëm.”
Kompania falënderon konsumatorët për mirëkuptimin dhe bashkëpunimin gjatë kësaj periudhe të vështirë, duke apeluar që të vazhdojnë me kursimin e energjisë, sidomos në orët e pikut të konsumit.
"Ne mbetemi të përkushtuar që, në koordinim të vazhdueshëm me institucionet përgjegjëse dhe partnerët e sektorit, të sigurojmë furnizim të qëndrueshëm dhe stabil", thuhet në njoftimin e KESCO-s.
Kjo vjen në kontekst të krizës energjetike të dimrit, ku ndërprerjet e shpeshta kanë prekur Kosovën për shkak të konsumit të lartë dhe prodhimit të kufizuar.