Rikthehen reduktimet e rrymës në Kosovë

Të martën, një pjesë e madhe e vendit u përball sërish me reduktime të energjisë elektrike. Kjo situatë ka ardhur si pasojë e temperaturave të ulëta dhe rritjes së konsiderueshme të konsumit për ngrohje, sipas njoftimit të Kompanisë për Distribuim të Energjisë Elektrike – KESCO.

"Sistemi elektroenergjetik i Kosovës po operon në kushte të vështira, ndërsa prodhimi vendor është i kufizuar. Kjo ka detyruar një rritje të nevojës për import, por mundësitë për import janë të kufizuara për shkak të kushteve teknike", thuhet në njoftimin e KESCO-s.

“Reduktimet e energjisë janë të domosdoshme për të ruajtur stabilitetin e sistemit dhe për të siguruar furnizim të vazhdueshëm.”

KESCO po shfrytëzon të gjitha mundësitë për sigurimin e energjisë përmes kontratave afatgjata dhe blerjeve në tregjet afatshkurtra, por në periudha të tilla mbulimi i plotë i kërkesës është i pamundur.

Ndërkohë, KOSTT ka kritikuar devijimet e KESCO-s, duke raportuar jo-balanca prej 211 MW-orë sot, dhe ka kërkuar korrigjim të menjëhershëm. Situata vazhdon të jetë sfiduese për konsumatorët në kushtet e dimrit të ftohtë.

KESCO apelon tek qytetarët për kursim energjie, veçanërisht gjatë orëve të pikut, dhe kërkon bashkëpunimin e institucioneve për të minimizuar ndikimin në jetën e përditshme.