KRM “Pastrimi” aplikon çmimoren e re për grumbullimin e mbeturinave në Prishtinë

Kompania Rajonale e Mbeturinave KRM “Pastrimi” Sh.A. ka njoftuar qytetarët dhe bizneset e Prishtinës se ka filluar zbatimin e çmimores së re për shërbimin e grumbullimit dhe transportit të mbeturinave komunale. Kjo është në përputhje me Rregulloren për Menaxhimin e Mbeturinave, të miratuar nga Kuvendi Komunal i Prishtinës në dhjetor 2023 dhe të publikuar në Gazetën Zyrtare të Republikës së Kosovës me Aktin Nr. 90391.

Tarifa për amvisëritë

Tarifa mujore për amvisëritë rezidente fiksohet në 5.56 euro pa TVSH, respektivisht 6.20 euro me TVSH 18%. Për amvisëritë jorezidente, pagesa vjetore arrin 17.8 euro me TVSH.

Tarifa për biznese

Për dyqanet e vogla dhe bizneset artizanale, tarifa mujore në zonat urbane është 8.4 euro me TVSH, ndërsa në zonat rurale 6 euro. Bizneset e mesme dhe të mëdha paguajnë nga 15 deri në 30 euro në urbane dhe 8.4-18 euro në rurale, varësisht nga madhësia dhe zona.

Shërbime speciale

Tarifa për kontejnerët: 18 euro për zbrazje të kontejnerit 1.1 m³ dhe 64.50 euro për 7.1 m³. Shërbimet me porosi për mbeturina vëllimore, ndërtimi apo të gjelbra variojnë nga 9.4 deri 9.9 euro për m³.

“Zbatimi i çmimores së re synon sigurimin e një sistemi financiar të qëndrueshëm, rritjen e transparencës në tarifim, përmirësimin e cilësisë së shërbimit dhe përmbushjen e standardeve mjedisore dhe të shëndetit publik.”

KRM “Pastrimi” fton qytetarët dhe bizneset për sqarime, duke theksuar se prioritet është një Prishtinë më e pastër dhe tarifim i drejtë për të gjithë.