Kryeziu: Opozita humbi sepse nuk krijoi energji, Kurti ishte në terren deri në ditën e fundit

Drejtori i Institutit Demokratik të Kosovës (KDI), Ismet Kryeziu, ka ofruar një analizë të detajuar mbi rezultatet e zgjedhjeve të fundit, duke vënë në dukje dështimet strategjike të partive opozitare në përballje me Lëvizjen Vetëvendosje.

Sipas Kryeziut, suksesi i Vetëvendosjes nuk duhet t'i adresohet thjesht votave të diasporës, pasi partia në pushtet doli e para edhe vetëm me votuesit rezidentë në Kosovë. Ai thekson se diaspora vetëm sa e thelloi fitoren që tashmë ishte siguruar në terren.

“Opozita humbi sepse nuk bëri politikë. Nuk ndërtuan terren, nuk mobilizuan struktura, nuk krijuan energji elektorale. Në vend të fushatës reale, zgjodhën komoditetin e rrjeteve sociale, improvizime e ambalazh, intervista të përsëritura dhe sallone politike të mbyllura.”

Kryeziu e ka cilësuar fushatën e opozitës si një "performancë simbolike" pa një horizont të qartë fitoreje, duke shtuar se liderët opozitarë ishin të shkëputur totalisht nga qytetarët. Ai bëri një krahasim direkt me angazhimin e Albin Kurtit, i cili sipas tij, nuk u ndal asnjë moment.

"Albin Kurti, edhe një ditë para zgjedhjeve, ishte në terren, në takime direkte me qytetarë dhe me figura e familje me peshë shoqërore e kombëtare," shkroi Kryeziu, duke nënvizuar se ndryshimi nuk mund të arrihet vetëm përmes intervistave televizive dhe fushatave digjitale.

Në përfundim, drejtori i KDI-së theksoi se rezultati zgjedhor ishte një "pasojë logjike" e zgjedhjes së opozitës për të qëndruar në rehati në vend të një beteje të mirëfilltë politike. Përgjegjësia, sipas tij, bie mbi vetë subjektet politike dhe jo mbi faktorë të jashtëm si diaspora.