PËRDITËSIM: Kurti në Akademinë “Flaka e Janarit”: Roli i Walkerit në Reçak dhe bashkëshortja e tij në emergjencë në Viti

Kurti merr pjesë në akademinë “Flaka e Janarit” në Gjilan

Kryeministri në detyrë i Republikës së Kosovës, Albin Kurti, pas homazheve në Dubovik të Deçanit për përvjetorin e 44-të të vrasjes së Jusuf e Bardhosh Gërvallës dhe vizitës te shtëpia e familjes së Kadri Zekës, mori pjesë në Akademinë e “Flakës së Janarit” në Teatrin e Qytetit në Gjilan. Kjo akademi i kushtohet Masakrës së Reçakut.

“Flaka e Janarit” ka nisur si shënim i 10-vjetorit të vrasjes së veprimtarëve patriotë Jusuf e Bardhosh Gërvalla dhe Kadri Zeka, të vrarë më 17 janar 1982 në Gjermani nga shërbimi sekret jugosllav. Më pas, u bashkua edhe kujtimi për rënien e Rexhep Malajt dhe Nuhi Berishës më 11 janar 1984 në Prishtinë nga policia jugosllave", u shpreh Kurti.

Rëndësia e traditës dhe Masakra e Reçakut

Kurti vlerësoi rëndësinë e ruajtjes së traditës për kultivimin e vlerave kombëtare. Ai përmendi se në vitin 1999, edicioni i tetë i festivalit u shkurtua për shkak të Masakrës së Reçakut më 15 janar, ku forcat serbe vranë 45 civilë të pambrojtur në fshatin Reçak të Shtimes.

“"27 vite më vonë, akademia përkujtimore e “Flakës së Janarit”, i kushtohet Masakrës së Reçakut, përkujtimit dhe nderimit të viktimave dhe dëshmorëve, të rënë atje, në luftën e drejtë të popullit tonë për çlirimin e Kosovës nga Serbia armike, okupatore dhe shtypëse””

Kurti theksoi rolin unik të ambasadorit William Walker si dëshmitar dhe denoncues i masakrës si krim kundër njerëzimit. Deklarata e tij e bëri të qartë botës të vërtetën për krimet shtetërore serbe në Kosovë.

Kurti uron shërim të shpejtë bashkëshortes së Walkerit

Gjatë fjalimit të tij në akademi, kryeministri Kurti ka njoftuar se bashkëshortja e ambasadorit William Walker është shtruar në emergjencën e Vitisë për një problem shëndetësor të rëndë, ndoshta arrest kardiak.

““Me këtë rast i bashkëngjitem urimeve për shëndetin e gruas së tij, e cila për shkak të një problemi shëndetësor, ndoshta edhe arrest kardiak, është duke u trajtuar në emergjencë në komunën e Vitisë dhe shpresojmë në rikuperim të plotë dhe të shpejtë të saj””

Kjo deklaratë e Kurtit ka tërhequr vëmendjen, duke shprehur solidaritet me figurën e rëndësishme të Walkerit dhe familjen e tij.

Mesazh përfundimtar

Në fund, Kurti shprehu konsideratat më të larta për vuajtjet dhe sakrificat e popullit tonë për lirinë: "Mes kujtimesh plot respekt për të rënët, me mirënjohjen më të thellë për të gjallët dhe trashëgimtarët, e duke besuar që rrugëtimi ynë i përbashkët që nga nderimi i të kaluarës na shpie në ndërtimin e së ardhmes".