“Liria ka Emër” merr mbështetje nga Bulliqi për marshin e 17 shkurtit

Përfaqësuesit e platformës qytetare “Liria ka Emër”, Eliza Hoxha dhe Ismail Tasholli, janë pritur në një takim nga kryetari i Komunës së Podujevës, Shpejtim Bulliqi.

Gjatë takimit, Bulliqi ka shprehur mbështetje të plotë për iniciativën e marshit “Drejtësi, jo politikë”, i cili do të zhvillohet më 17 shkurt në Prishtinë, në mbrojtje të vlerave të luftës çlirimtare të UÇK-së.

““Marshi “Drejtësi, jo politikë” është një mesazh i fuqishëm kundër shndërrimit të drejtësisë në instrument politik””

Hoxha dhe Tasholli e informuan kryetarin Bulliqi për misionin e platformës dhe aktivitetet e fushatës së mobilizimit qytetar për këtë ngjarje të rëndësishme.

““Angazhimi ynë si komunë është i qartë. Ne do ta përkrahim këtë iniciativë, sepse besojmë se vetëm me solidaritet dhe pjesëmarrje masive mund të mbrojmë idealet që na kanë sjellë lirinë””

Bulliqi u zotua se Komuna e Podujevës dhe qytetarët e saj do të mobilizohen për një pjesëmarrje sa më të gjerë në këtë marsh.

Platforma “Liria ka Emër” ka filluar një seri takimesh nëpër komunat e Kosovës për të nxitur mobilizimin më të madh të mundshëm për protestën e 17 shkurtit, nën moton “Drejtësi, jo politikë”.

Kjo iniciativë vjen në kontekstin e zhvillimeve në Gjykatën Speciale të Hagës dhe nevojës për drejtësi të paanshme për ish-udhëheqësit e UÇK-së. Takime të ngjashme janë mbajtur më parë me figura të tjera politike si Ardian Gjini nga Gjakova.