Molliqaj paralajmëron opozitën: Gabimi fatal nëse ia jepni Kurtit koorumin për zgjedhjen e presidentit
Kryetari i PSD-së, Dardan Molliqaj, e ka cilësuar si gabimin më të rëndë të mundshëm të opozitës dhënien e koorumit Albin Kurtit për zgjedhjen e presidentit, duke argumentuar se kjo do t'i hapë rrugë kontrollit të plotë të institucioneve kyçe si Gjykata Kushtetuese dhe Kryeprokuroria.
Molliqaj: Opozita pa shans nëse vazhdon kështu
Kryetari i Partisë Socialdemokrate (PSD), Dardan Molliqaj, në një intervistë për Blic, ka analizuar situatën e opozitës kosovare pas zgjedhjeve të fundit. Ai thekson se opozita tradicionale nuk ka shanse nëse vazhdon të mbështetet në nostalgji dhe pritje për kthimin e votuesve të larguar.
"Në mënyrën mekanike si këta e shohin, asnjë shancë nuk ka. Këta mendojnë se votuesit do të kthehen, por votuesi bashkohet rreth ideve dhe kauzave, jo nostalgjisë", ka thënë Molliqaj.
“Opozita i ka veç edhe dy momente: zgjedhjet e brendshme të tyre dhe a ja bëjnë koorumin Albin Kurtit për Presidentin. Pas këtij momenti, opozita do të jetë totalisht pasive dhe irrelevante.”
Molliqaj e sheh dhënien e koorumit si hap vendimmarrës që do ta bëjë opozitën të pavlerë. Ai argumenton se presidenti i ardhshëm do të shërbejë për të kontrolluar Gjykatën Kushtetuese dhe Kryeprokurorinë, duke ia shtrirë pushtetin Kurtit.
"Gabimi më fatal do të jetë nëse ja bëjnë koorumin për zgjedhjen e Presidentit... do t’i shërbejë Albin Kurtit për dy çështje të rëndësisë jetike: zgjedhja e gjyqtarëve të Kushtetueses dhe Kryeprokurorit", shton ai.
“Gjykata Kushtetuese dhe Kryeprokuroria janë dy institucionet kryesore që pengojnë pushtetet autoritare.”
Molliqaj rikujton rolin e Vjosa Osmanit në refuzimin e Kryeprokurorit, duke theksuar se presidenti ka fuqi të madhe në këto emërime. Ai paralajmëron deputetët për përgjegjësi historike nëse lejojnë një gjë të tillë.
PSD-ja, sipas tij, ofron një alternativë të re për opozitën, duke u bazuar në ide të freskëta dhe jo në strukturat e vjetra.