Myftiu Tërnava: Jam i tronditur nga akti kriminal i djegies së Kuranit të Shenjtë, i kryer me porosi!
Myftiu i Kosovës, Naim Tërnava, reagon i tronditur për djegien e Kuranit në Çabrat të Gjakovës, duke e quajtur akt të porositur dhe pasojë të propagandës së urrejtjes. Ai kërkon hetim të menjëhershëm dhe ndëshkim të autorëve e ideatorëve.
Myftiu Tërnava: Jam i tronditur nga akti kriminal i djegies së Kuranit të Shenjtë, i kryer me porosi!
Myftiu i Kosovës, Naim Tërnava, ka reaguar me tronditje të thellë ndaj aktit vandal të djegies dhe përdhosjes së Kuranit të Shenjtë në Çabrat të Gjakovës. Ai e ka cilësuar këtë si një veprim kriminal të porositur, që cenon vlerat humane dhe identitetin shqiptar.
“Një veprim i tillë është plotësisht i papranueshëm, pasi cenon rëndë vlerat universale humane të qytetërimit botëror dhe, njëkohësisht, godet drejtpërdrejt parimet, traditën dhe identitetin e popullit tonë.”
Tërnava thekson se populli shqiptar është identifikuar për harmoninë ndërfetare dhe respektin ndaj besimit të tjetrit. Ai kritikon lëvizjet e errëta që promovojnë urrejtje në emër të një 'shqiptarie të deformuar' dhe lidh incidentin me propagandën e urrejtjes të përhapur nga individë dhe grupe të organizuara, madje profesorë universitarë.
“Djegien dhe përdhosjen e Kuranit në Gjakovë e shohim si një akt konkret dhe alarmues, si pasojë direkte e këtyre ideologjive antishqiptare dhe antiislame.”
Myftiu kërkon nga organet kompetente veprime të menjëhershme ligjore ndaj autorëve, por edhe ndaj ideatorëve, mentorëve dhe ideologëve të kësaj ideologjie të rrezikshme.
Incidenti ka ngritur shqetësime të mëdha për sigurinë fetare në Kosovë, ku toleranca ndërfetare ka qenë gjithmonë vlerë bazë.