Nura i PDK-së kundër mandatit të dytë për Vjosa Osmanin: Rifat Jashari, figura unike për president

Deputeti i Partisë Demokratike të Kosovës (PDK), Jakup Nura, ka shprehur mendimin se subjekti politik që përfaqëson nuk duhet ta mbështesë presidenten Vjosa Osmani për një mandat të dytë në krye të shtetit.

Gjatë një apariute në emisionin “Ditari” në T7, Nura argumentoi se Osmani gjatë mandatit të saj ka treguar njëanshmëri të qartë në favor të Lëvizjes Vetëvendosje, partisë në pushtet.

““Vjosa Osmani nuk duhet të ketë votë nga PDK-ja dhe nga asnjë parti tjetër opozitare, pasi është parë qartë që ka mbajtur qëndrime pro Lëvizjes Vetëvendosje””

Sipas tij, pas zgjedhjeve ka pasur një takim me Osmanin, por çështja e mandatit të dytë nuk është diskutuar. Nura insiston që PDK-ja duhet të dalë me një propozim të vetin për postin e presidentit.

Ai thekson se figura e propozuar duhet të jetë unike dhe përbashkuese, dhe emri më i përshtatshëm është Rifat Jashari.

““PDK-ja do të duhej të dilte me një propozim me një figurë unike dhe përbashkuese... Në këtë mandat do të ishte e drejtë dhe e mirë që të propozohej Rifat Jashari për president të Kosovës. Do të ishte një nder për Kosovën””

Nura shprehet optimist se Jashari do të kishte përkrahje të gjerë nga partitë e tjera, pa nevojë për koordinim paraprak, duke u mbështetur në reputacionin e tij si figurë që promovon unitetin politik.

Ky qëndrim vjen në kontekstin e diskutimeve për zgjedhjen e presidentit të ri të Kosovës pas përfundimit të mandatit të Osmanit.