Operacioni “Bregdeti”: Konfiskohen mbi 80 kg marihuanë, armë zjarri dhe para, arrestohen tre të dyshuar në Merdare dhe Podujevë
Prokuroria Themelore në Prishtinë dhe Policia e Kosovës kanë finalizuar operacionin e koduar “Bregdeti” pas hetimeve disa mujore, ku janë konfiskuar 80.8 kg marihuanë, armë zjarri, telefona dhe 2950 euro para të gatshme. Tre të dyshuar janë arrestuar për 48 orë.
Operacioni “Bregdeti” godet rrjetin e trafikut me marihuanë
Prokuroria Themelore në Prishtinë, në bashkëpunim të ngushtë me Policinë e Kosovës, ka zhvilluar me sukses operacionin e koduar “Bregdeti” pas hetimeve disa mujore dhe zbatimit të masave të veçanta hetimore.
Më 21 janar 2026, rreth orës 23:00, në afërsi të pikëkalimit kufitar Merdare, është ndaluar i dyshuari H. S., drejtues i një kamioni me targa vendore. Gjatë kontrollit, janë gjetur 68 paketime me marihuanë, me peshë totale prej 76 kg e 800 gramë.
Kontrolli në shtëpinë e të dyshuarit
Në shtëpinë e të dyshuarit, me urdhër kontrolli dhe në asistencë të Njësisë për Negociata dhe Reagim të Shpejtë (NJRSH), janë gjetur:
- 1 armë zjarri me 5 fishekë të kalibrit 9 mm,
- 1 telefon celular,
- 2950 euro para të gatshme.
Bastisje në Podujevë
Më 22 janar 2026, janë bastisur dy shtëpi në fshatin Godishnjak të Podujevës, ku janë gjetur:
- 4 paketime marihuanë me peshë 4 kg e 454 gramë,
- 2 telefona celularë,
- Thasë najloni dhe ngjitës të përdorur për paketim,
- 1 armë zjarri me gaz model Signasauser.
Tre të dyshuarit janë mbajtur në ndalim për 48 orë me urdhër të prokurorit. Hetimet do të vazhdojnë për të zbardhur plotësisht rastin.
“Prokurori i shtetit dhe Policia e Kosovës mbeten të përkushtuara në luftën kundër krimit për një Kosovë më të sigurt.”