Opozita shqiptare mbyll protestën me tensione, Berisha: Jemi në kilometrin e fundit drejt fitores

Protesta kombëtare e thirrur nga Partia Demokratike (PD) në Tiranë, këtë të shtunë më 24 janar, ka përfunduar me tensione të larta dhe lëndime mes demonstruesve dhe forcave të rendit.

Sheshi “Dëshmorët e Kombit” u mbush nga mijëra simpatizantë të opozitës, të cilët mbështesin kërkesat e PD-së për formimin e një qeverie teknike për të garantuar zgjedhje të lira e të ndershme.

Protesta filloi me intonimin e himnit kombëtar, pasuar nga fjalime të deputetëve demokratë. Kulmi erdhi me deklaratën e kryetarit të PD-së, Sali Berisha.

““Të nderuar drejtues të PD-së, partive aleate, të nderuar deputetë të pranishëm në këtë protestë. Vëllezër e motra, do ta nis këtë fjalë me një mesazh... Sot ne jemi në kilometrin e fundit, me ndihmën e Zotit, asgjë nuk do të na ndalë drejt fitores sonë. Sot ne jemi pranë triumfit të madh...””

Berisha theksoi sakrificat e opozitës gjatë viteve të fundit kundër asaj që ai e quajti “narkoshtet” i Edi Ramës, duke premtuar vazhdim të qëndresës deri në fitoren përfundimtare.

Sipas raportimeve, protesta u shoqërua me hedhje molotovësh dhe fishekzjarrësh, duke shkaktuar lëndime dhe tensione. Policia raportoi për arrestime dhe lëndime të efektivëve të saj në vende të tjera të protestave.

Kjo protestë vjen në kontekstin e tensioneve politike në Shqipëri, ku opozita akuzon qeverinë për manipulime zgjedhore dhe kërkon qeveri teknike për të mbikëqyrur procesin zgjedhor.

Zhvillimet e fundit në protesta

Më herët sot, raportohet për 11 efektivë policie të lënduar nga sulme me molotov pranë Kryeministrisë dhe Parlamentit. Berisha ka kërkuar lirimin e menjëhershëm të 25 protestuesve të arrestuar.