Osmani tregon detaje për takimet me Trump

Presidentja e Republikës së Kosovës, Vjosa Osmani, ka dhënë detaje të reja rreth takimeve të saj me Presidentin e Shteteve të Bashkuara, Donald Trump.

Në një intervistë të dhënë për podcast-in “Përballje”, Osmani ka theksuar se ka pasur disa diskutime me Trump që nga zgjedhja e tij, me fokus kryesor në sigurinë dhe stabilitetin rajonal.

““Kam pasur disa diskutime me Presidentin Trump nga momenti i zgjedhjes së tij. Një nga takimet kryesore është zhvilluar në Paris, në Pallatin Elize. Diskutimet kanë qenë të fokusuara në situatën e sigurisë dhe në nevojën që Shtetet e Bashkuara të Amerikës të vazhdojnë të kenë rol lidershipi në mirëmbajtjen e paqes dhe sigurisë në rajonin tonë...””

Takimi në Paris dhe bisedat në Kombet e Bashkuara kanë qenë të orientuara drejt rolit të administratës Trump në paqen e Kosovës dhe më gjerë.

Osmani ka nënvizuar se Amerika mbetet partneri kryesor në mbrojtjen e kufijve, forcimin e institucioneve të sigurisë dhe ruajtjen e sovranitetit të plotë të Kosovës.

““Roli i Amerikës në mirëmbajtjen e paqes dhe sigurisë në Kosovë, në mbrojtjen e kufijve tanë së bashku me institucionet tona të sigurisë dhe në shtyrjen përpara të Kosovës me sovranitet të plotë dhe integritet territorial të plotë, është rol i pazëvendësueshëm.””

Kjo deklaratë vjen në një kohë kur Kosova vazhdon të mbështetet te aleatët ndërkombëtarë për stabilitetin rajonal, veçanërisht në kontekstin e marrëdhënieve me Serbinë dhe sfidave gjeopolitike.

Intervista nxjerr në pah forcën e lidhjeve diplomatike mes Prishtinës dhe Uashingtonit.