OVL e UÇK-së: Gjykata Speciale po bën 'kontroll dëmi' për imazhin e saj të dëmtuar

Organizata e Veteranëve të Luftës së Ushtrisë Çlirimtare të Kosovës (OVL e UÇK-së) ka dalë me një reagim të fortë ndaj asaj që e quan përpjekje të Dhomave të Specializuara për të menaxhuar imazhin e tyre publik pas shkeljeve të rënda.

Sipas tyre, kjo nuk është një ligjëratë e rastësishme, por një veprim i qëllimshëm për të rikthyer besueshmërinë e humbur. OVL-ja thekson se Gjykata Speciale duhet të fokusohet te respektimi i Kushtetutës së Kosovës dhe standardeve ndërkombëtare të drejtësisë, në vend të fushatave propagandistike.

“Kjo që po shohim nuk është ligjëratë e rastësishme, por përpjekje e qartë e Dhomave të Specializuara për 'kontroll të dëmit' ndaj imazhit të tyre të rënduar, pas shkeljeve të njëpasnjëshme që i kanë bërë ndaj të drejtave themelore të të akuzuarve dhe ndaj vetë rendit kushtetues të Republikës së Kosovës.”

OVL-ja krahasoi këtë qasje me metodat e pushtetit jugosllav pas demonstratave studentore të 1981-s, ku organizoheshin mbledhje për të dënuar organizatorët dhe përgatitur opinionin për dënime të rënda.

Shkeljet kryesore të Gjykatës Speciale sipas OVL-së:

• Shkelja e parimit të barazisë para ligjit, duke ndjekur vetëm luftën çlirimtare të UÇK-së, ndërsa krimet serbe mbeten të pandëshkuara.
• Mohimi i vazhdueshëm i lirimit të përkohshëm, edhe në rrethana humanitare.
• Zgjatja e pajustifikueshme e paraburgimit pa vendime përfundimtare.
• Cenimi i dinjitetit të të paraburgosurve me kushte kufizuese.
• Mungesa e transparencës dhe llogaridhënies publike.
• Ndërhyrje në arsim pa autorizim.

OVL-ja kërkon që Gjykata Speciale të përmirësojë besueshmërinë duke respektuar ligjet dhe standardet ndërkombëtare, jo përmes propagandës.

Kjo reagim vjen në kontekst të diskutimeve të fundit për ligjëratat edukative të Gjykatës Speciale në shkolla, të cilat kanë ngjallur debate të mëdha në Kosovë.