Paralajmërohet erë e fortë nesër në Prishtinë, Komuna jep udhëzime për sigurinë e qytetarëve

Paralajmërohet erë e fortë për nesër në Prishtinë

Komuna e Prishtinës ka njoftuar qytetarët për një paralajmërim të erës së fortë për të dielën, 25 janar, bazuar në të dhënat e Institutit Hidrometeorologjik të Kosovës (IHMK). Erërat pritet të jenë më intensive në zonat lindore dhe kodrinoro-malorë.

Drejtoria për Siguri dhe Emergjenca e Komunës së Prishtinës ka specifikuar intensitetin e erës: në zonat kodrinoro-malorë 11-14 m/s (erë e fortë), ndërsa në zonat më të ulëta 8-11 m/s (erë mesatarisht e fortë). Këto erëra pritet të dobësohen nga mëngjesi i së hënës.

“Bazuar në paralajmërimin e IHMK-së, nga mëngjesi i ditës së diel pritet të ketë erëra të intensitetit mesatar deri të fortë.”

Udhëzime dhe këshilla për qytetarët

• Siguroni ose largoni objektet e lehta në ballkone, oborre apo çati (vazo, reklama, panele të përkohshme).
• Tregoni kujdes gjatë qarkullimit në zona me pemë të larta, tabela reklamuese apo objekte ndërtimore.
• Shmangni qëndrimin e panevojshëm në hapësira të hapura gjatë intervaleve me erë më të fortë.
• Drejtuesit e automjeteve, veçanërisht të mjeteve të larta, të lëvizin me kujdes të shtuar.
• Nëse vëreni rrezik potencial (degë të rëna, objekte të lëvizshme, dëmtime), njoftoni shërbimet kompetente.

Në raste emergjente, qytetarët mund të kontaktojnë numrat 0800 122 44 ose 0800 122 33. Drejtoria për Siguri dhe Emergjenca do të jetë në gatishmëri të plotë dhe do të informojë për çdo zhvillim të ri.

Qëndroni të informuar dhe tregoni kujdes për një ditë më të sigurt.