Përditësim: Arratisja e Altin Ndocit - Gjykata lë në qeli 3 punonjës burgu nga 8 të arrestuar

Gjykata e Durrësit, pas një seance gati 4-orëshe, ka vendosur që nga 8 punonjësit e burgut të Durrësit të ndaluar nga policia pas arratisjes së të paraburgosurit Altin Ndoci nga ambientet e spitalit, të lihen në burg 3 prej tyre.

Ndërsa për pesë të tjerët janë vendosur masat e sigurimit: arrest shtëpie dhe detyrim paraqitjeje.

Ndaj tyre është ngritur akuza për shpërdorim detyre, e kryer në bashkëpunim, si pasojë e së cilës nuk u arrit të parandalohej arratisja e të arrestuarit, i cili akuzohet për një sërë ngjarjesh të rënda kriminale.

Sakaq, Altin Ndoci vijon të jetë ende në arrati, ndërsa hetimet po vazhdojnë për kapjen e tij.

Seanca në gjykatë

Sot të shtunën, tetë të arrestuarit, mes tyre gjashtë efektivë të Policisë së Burgjeve, shefi i komanduar i policisë së burgut dhe kryeinfermierja e IEVP Durrës, janë paraqitur në Gjykatën e Durrësit për vendosjen e masës së sigurisë.

Zhvillime të mëparshme

Dje, gjykata kishte vendosur 'arrest në burg' për ish-drejtorin e IEVP Durrës, Indrit Cërlojn, dhe 'arrest në shtëpi' për mjeken e burgut, Ylfete Sema.

Arratisja e Altin Ndocit ka nxjerrë në pah probleme serioze në sigurinë e institucioneve burgjore dhe ka shkaktuar reagime të forta publike.