PËRDITËSIM: Faton Peci reagon pas intervistimit nga Prokuroria Speciale për rastin e granteve

Ish-ministri i Bujqësisë, Faton Peci, kryetar aktual i Mitrovicës, është intervistuar sot nga Prokuroria Speciale në cilësinë e të pandehurit në rastin e granteve. Pas intervistimit, Peci ka reaguar në rrjete sociale, duke e quajtur kallëzimin penal të ngritur nga LDK-ja, përmes Paris Gurit, si të rremë.

““Ju njoftojmë se Faton Peci është intervistuar në cilësinë e të pandehurit në rastin e granteve, i cili është në trajtim nga Prokuroria Speciale e Republikës së Kosovës””

Rasti lidhet me dyshime për parregullsi në shpërndarjen e granteve gjatë mandatit të Pecit si ministër i Bujqësisë, Pylltarisë dhe Zhvillimit Rural.

Reagimi i Faton Pecit

Në një postim në Facebook, Peci shkruan se ka qenë transparent në Prokurori dhe paralajmëron kallëzim penal kundër Gurit për 'kallëzim të rremë penal' dhe fushatë shpifjesh.

“Të dashur qytetarë, përmes këtij postimi, ju informoj se sot isha në Prokurori për të dhënë përgjigjet dhe sqarimet e mia në kallëzimin penal të ngritur nga LDK-ja përmes ish-deputetit të saj të zgjedhur nga votat e vjedhura të mërgatës, Paris Guri. [...] Shumë shpejt, do t’iu drejtohem organeve të drejtësisë me një kallëzim penal kundër kallëzimit të rremtë penal ndaj ish deputetit me vota të vjedhura të mërgatës. [...] Për fund, dua të përsëris dhe t’ju siguroj se sulmet, akuzat e pabaza, gënjeshtrat, shpifjet, kërcënimet e përpjekja për baltosjen e emrit tim, nuk më ndalin nga punët e mira e punët e mëdha për Kosovën! Vazhdojmë!”

Peci thekson se do të vazhdojë angazhimin e tij për zhvillimin e Kosovës pavarësisht sulmeve politike.