PËRDITËSIM: Berisha kërkon lirimin e menjëhershëm të 25 protestuesve paqësorë, beteja jonë deri në fundin e Ramës
Kryetari i PD-së Sali Berisha, pas përfundimit të protestës para Kryeministrisë, nga selia e PD-së kërkoi lirimin e 25 protestuesve paqësorë të arrestuar nga policia. Opozita premton vazhdim të betejës kundër qeverisë së Edi Ramës.
PËRDITËSIM: Berisha kërkon lirimin e menjëhershëm të 25 protestuesve paqësorë, beteja jonë deri në fundin e Ramës
Gjatë protestës kombëtare të opozitës shqiptare para Kryeministrisë në Tiranë, situata ka eskaluar pas fjalimit të kryetarit të Partisë Demokratike, Sali Berisha. Protestuesit hodhën shishe molotovi dhe fishekzjarrë drejt godinës, duke lënduar efektivë policie. Turma u zhvendos drejt Kuvendit.
Berisha deklaroi se qeveria e Edi Ramës nuk largohet me votë, por me revoltë popullore. Ai e cilësoi Ramën si kryesin e një organizate kriminale dhe thirri për qeveri teknike dhe zgjedhje të reja.
“Sot shumica e shqiptarëve e ka të qartë se Edi Rama nuk ikën me votë. Diktaturat nuk ikin me votë, por shemben vetëm me revoltë popullore, dhe ja ku jemi ne sot.”
Pas protestës, nga selia e PD-së (selia blu), Berisha kërkoi lirimin e menjëhershëm të 25 protestuesve paqësorë të arrestuar nga policia pas përplasjeve.
“Kërkoj lirimin e menjëhershëm të 25 protestuesve paqësorë, të cilët në mënyrë absolute nuk kanë kryer asnjë akt dhe janë marrë aty me urdhër të Edi Ramës. Ju kërkoj komisariateve t’i lirojnë menjëherë.”
Ai e cilësoi Ramën si “armik të çdo shqiptari” dhe premtoi vazhdim të betejës deri në fundin e qeverisë. Berisha u bëri thirrje policëve të mos shërbejnë Ramës, duke i quajtur ata shërbëtorë të një njeriu pa ligj dhe moral.
“Ne kemi vetëm një mision, përmbysjen e këtij regjimi kriminal.”
Burimi: Telegrafi